Могай лиеш республикына?

Илем Башкортостан Республикысе Шаран селаште. Селана кугу, мотор, кечын тӱзлана, кушкеш. Илыш ончыко кая, икшыве-влак шочыт, кушкыт. Кажне сурт поян сад-пакча дене ойыртемалтеш. Еҥ-влак шуко вольыкым, сурткайыкым, кроликым, мӱкшым ашнат. Сад-пакчаште ужар ломбо, пызле, поланвондо, ирга кушкыт. Села шеҥгелне верланыше кугу чодыра йӱштӧ мардеж деч арала. Туймаза олат мӱндыр огыл. Мыйын авам ден ачам олаш пашаш коштыт, мыланем сурт пашам ышташ кодеш.

Республикынан рӱдолаже мемнан села деч мӱндыррак - Уфаште. Автобус ныл шагат кая, нояш лиеш. Корныжат пеш сай огыл, асфальтшат пытен толеш. Можыч, лу ий гыч писе поездым шонен луктыт? Пел шагатыште Уфашке миен шуаш лиеш, еҥ-влак больницышкат миен толыт ыле (А больницыже эн сай лийшаш, тӱрлӧ черым эмлышаш). Каныш кечын экскурсий дене коштын савырнаш кумылло!

Ме кызыт коло икымше курымышто илена, социальный сетьлаште «шинчена», а тушто мо гына уке! Тӱрлӧ сайт, блог, чат, форум кечын гаяк шочыт! Селамат моторландараш лиеш, пӧртымат икмыняр секундышто чоҥаш лиеш. Тиде мыланем келшыш. Республикем ончальым - ваштар лышташ гае.

Лу ий гыч, шонем, шуко вашталтыш лиеш. Кугу олаште велосипед ден скейтборт дене кошташ тӱҥалыт. Машина-влак ола тӱрыштӧ гына лийыт, завод ден фабрикыште робот-влак пашам ыштат. А еҥ-влак йочаштым ончат, туныктат, тӱрлӧ элым ончыктат, канаш коштыт. Республикыштына корно чатка, кумда, чыла вере тӧр асфальт лиеш. Школ, йочасад-влак шукемыт, моторланат. Интернет класс-влак шукемыт. Ача ден авана (кӧн йоча-шамычше шуко) пӧртыштӧ шинчаш тӱҥалыт, нунылан субсидий семын оксам пуат. Можыч, Интернетыште пашам ышташ тӱҥалыт, тунемыт. Сурт оралтым да пакчам, садым арун кучат, моторландарат.

Кажне олаште, селаште, ялыште спорт комплексым, бассейным чоҥат. Кастене да каныш кечын изижат, кугыжат еш дене пырля канаш, тазалыкым тӧрлаташ миен кертыт.

Республикына кажне ийын тӱзлана, вес эл гыч турист, калык-влак ончаш толыт: мемнан йылмынам, тӱвыранам, йӱланам шымлат. Ме икте-весе дене келшен илена. Газ ден нефть олмеш куштырам да кушкылым кучылташ тӱҥалыт. Ушан еҥ-влак келыштарат, шонем. Шонымем шукталтше! Республикем поян, мотор лийже!