Сайын служитлен пӧртылын

Акпарс школышто индеш классым тунем лекме деч вара Дмитрий Туймазасе индустриальный колледжыште шинчымашым поген. 2018-ше ий кеҥежым, экзамен-влакым сайын кучен, машиностроенийын технологийже специальность дене дипломым налын. Колледжыште тунемме жапыштак пашазе профессийым - программный управлениян станокын 2-шо разрядан операторжо специальностьым да водительский удостоверенийым налын. Дмитрий Октябрьский оласе низковольтный аппаратура заводышто (ОЗНА) качествым эскерыме пӧлкаште специалистлан ышташ тӱҥалын. А ноябрь тылзыште Россий Вооруженный вий радамыш служитлаш каен.

Могай рвезын моряк лиймыже огеш шу? Уш дене кажныже шкенжым теҥызыште, океаныште ужеш докан - кушто подвиглан, чын пӧръеҥ койышлан, нигӧн кӱрлын кертдыме теҥыз кылдыш гай пеҥгыде келшымашлан вер уло, тушто лийнеже.

Рвезым салтакыш налме годым тудын дипломжат, мыняр-гынат еҥ дене вашкылым муын моштымашыжат лийын - илышыште тидыжат кӱлешан. Тудо тунеммыж годымак шкенжым ончыкылык службылан ямдылен: таза илыш-йӱлам кучен, куржталын, футболла модын. Врач-влак медкомиссийым эртымыж годым - Военно-морской флотышто служитлаш йӧршылан шотленыт. Тыге Дмитрий ончыч Балтий теҥыз серыш, Калининград олаш, тушечын Балтийск олаш логалын.

Теҥызыш колтымо деч ончыч рвезе-влаклан самырык боецын курсшым эртареныт. Дмитрий Ахметшин «Тӱҥ двигательын мотористше» специальностьым налын. Куштылго огыл экзаменым сайын кучен, «Минск» кугу десантный корабльыште служитлаш тӱҥалын.

Рвезе сайын служитлен, командир-влакын приказыштым шуктен шоген. Служебный обязанностьым шот дене шуктымылан, инициативный, тыршышан улмылан, боевой ямдылалтмаште сеҥымашке шумылан тудлан Чап грамот-влакым кучыктеныт. Эше Дмитрий 2019 ийыште тӱҥ военно-морской парадыште лийын да Россий Федерацийын Оборона министерствыжын «За участие в главном военно-морском параде» медальжым сулен.

Ме землякна дене кугешнена да Дмитрийлан ончыкыжат пашаштыже сеҥымашлашке шуын шогаш, таза лияш тыланена. Поснак кугу таум каласыме шуэш тудым ончен куштышо аваже Наталья Анатольевналан, кочаже Анатолий Тимирбаевичлан да куваваже Рима Давлетовналан. Тек Д. Ахметшин моло эрге-влакланат эре пример лиеш.