Тистынат пайремже уло

Йоча-влаклан рӱдӧ библиотекыште «Российын кум тӱсшӧ» урок-модмашым ямдылыме ыле. Тушто йоча-влак кугыжаныш символикын историйжым, тистысе тӱс-влакын мом ончыктымыштым, кажне элыште герб, гимн, тисте улмо нерген пален нальыч. Пайрем мучаште «Россий, ме тыйын икшывет улына!» мурым шарналтышт. Самырык-влаклан библиотека «Элын тистыже кугешнен лойгалтеш» викториным эртарыш. Тушто йоча-влак Российын историйже дене кылдалтше событий-влак нерген шинчымашыштым келгемдышт. «Российын тистыже» мастер-классат пайдале ыле. Рӱдӧ библиотека эн изи ньога-влакым «Триколор - мемнан кугешнымаш» патриотизм шӱлышан шагатыш чумырыш. Ӱдыр-рвезе-влак Российын гимнжым йоҥгалтарышт, тисте нерген почеламутым лудыч. Электрон библиотекын пашаеҥже-влак оҥай программа дене оласе 32-шо йочасадыш унала мийышт. Йоча-шамычлан модыш йӧре тӱрлӧ оҥай заданийым шукташ моткоч оҥай ыле.

Кугыжаныш тистылан лӱмлымӧ кече йоча-влаклан кугу да виян элын ужашыже, Российын гражданинже улмыштым шижаш полша, Шочмо эл дене кугешнаш тарата.