«Стартлан» - 45 ий

Кодшо арня мучаште «Стартыште» лагерьым почмылан 45 ий, тудлан негызым пыштыше тренер, СССР спорт мастер Д.Т. Тимиркаевын шочмыжлан 80 ий теммылан да Физкультурникын кечыжлан лӱмлымӧ пайремым эртарышт. Тыгай амал дене тушко самырык тукымым шуарен куштышо ятыр ече спорт ветеран, физкультур туныктышо да тренер погынен миеныт ыле.

Денис Тимиркаевичын Ольга ӱдыржӧ, Валерий ден Александр эргыже-влак (Чылаже ешыште вич икшывым ончен куштеныт.) лагерь почмо ийлам, шкештат тушто кушмыштым шарнен каласкалышт да лагерьлан пӧлекым кучыктышт. Лӱмлӧ тренерын йолташыже, 80 ияш Евгений Андрианов залыште шинчыше ӱдыр-рвезе-влаклан Д. Тимиркаевын тунемме да паша корныжо, кумда кругозоран улмыжо, могай произведенийлам лудаш йӧратымыже нерген оҥайын ойлен пуыш.

Лагерь вуйлык Р.Ш. Шайбаков шуко унам сценыш ӱжӧ, спорт ветеран-влаклан таумутан серышым да пӧлекым кучыктыш. Самырык ӱдыр-эрге-влак шуко ий дене спорт дене заниматлыше кугурак ийготан еҥ-влакым тӱткын колыштыч. Кугу Соказа школын тренерже Юрий Айгузинын да тудын кок эргыжын таҥасымашлаште сеҥен налме ятыр шӱдӧ дене медальышт гыч ик ужашыжым (Нуным сценыш шарен оптеныт.) пеш тӱткын шымлышт, йодышым пуэдышт…

(остальные фото можно посмотреть по ссылке)

Лагерьын актовый залыштыже, эн коймо верыште, ты кундемын шочшыжо-влакын - куштылго атлет, марафонец Григорий Андреевын, паралимпиец-влак Кирилл Михайловын да Ростислав Павловын фотосӱретышт кеча. Нунат икшыве-влаклан моткоч кугу пример улыт. Тыгай вашлиймаш-влак арам огыт эрте, кушкын толшо тукымын илышыштыже могай-гынат кышам кодатак манын ӱшаныме шуэш.