Уфаште Тӱнямбал йоча модмаш эртен

Спортын индеш олимпийский видше: куштылго атлетика, вӱдыштӧ иймаш, фехтований, греко-римский кучедалмаш, дзюдо, мини-футбол, 3х3 баскетбол, пляжысе волейбол, скалолазаний - дене таҥасымашлаште 87 комплект награда модылтын. Мемнан республикын самырык спортсменже-влак 13 шӧртньӧ, 15 ший да 22 бронза медальым модын налыныт.

Тӱнямбал йоча модмашым петырыме церемоний Уфасе «Ватан» паркыште пеш ямлын эртен. Тӱнямбал йоча модмашын комитетшым вуйлатыше Торстен Раш мероприятийым сай кӱкшытыштӧ эртарен колтымылан республика Вуйлатышын пашажым шуктышо Р. Хабировлан да Уфа олан мэрже У. Мустафинлан кугу таум каласен. Ты таҥасымашын флагшым Венгрийысе Кечкемет олалан кучыктеныт - 2020-шо ийыште Тӱнямбал йоча модмаш тушто лиеш.