Мландым куралде, киндым от коч

Мишкан агропромышленный колледж икмынярымше ий почела унам вашлиеш. Тений республикысе олимпиадыш 31 район да 9 ола гыч 40 самырык тракторист да производственный туныктымашын мастерже-влак толыныт. Тыгай таҥасымаш-влак республикыште эн сай самырык трактористым ойырен налаш, тунемше-влакын мастарлыкыштым шуараш полшат. Тыгай кӱкшытан мероприятийым шке ӱмбаке налаш, ӱшаным сулаш - куштылго паша огыл. Тыште колледжым вуйлатыше В.Т. Байбулатовын надыржым эн ончыч палемдыман.

«Зилаир районысо ик фермер дене вашлийме годым ял озанлыкын ончыкылыкшо нерген мут лекте, - каласкалыш олимпиадын судьяже, БР-ысе Ял озанлык министерствын кушкыл да кургым ямдылыме шотышто пӧлкан тӱҥ специалист-экспертше Агзам Душанбаев.

- Мланде пашаеҥым озанлыкшын ончыкылыкшо тургыжландара, молан манаш гын тудлан кызыт илалше механизатор-влак дене пашам ышташ логалеш.

Ялыште тракторист-влак ий еда шагалемыт, самырык-влак коклаште мланде пашам ышташ кумылан-влак йӧршын гаяк уке улыт. Шке озанлыкшым эргыжлан кодынежат, «Эргым кӧ дене пашам ышташ тӱҥалеш?» манын ойгыра».

Тыгай олимпиада-влак, мыйын шонымаште, тракторист профессийын престижшым нӧлталаш, рвезе-влаклан илышыште шке верым муаш полшат. «Мишкан агропромышленный колледж республикыштына механизатор-влакым ямдылыше тунемме заведений-влак коклаште ончылно улеш, садлан олимпиадым кушто эртарыме шотышто йодыш лектын огыл, - мутшым шуя специалист. - Тыште икмыняр ий почела республикысе Ял озанлык министерствын, Гостехнадзорын, Мишкан район администраций пеленсе ял озанлык пӧлкан тӱҥ специалистше-влак гыч шогышо тале судейский коллегий пашам ышта. Тыгай кугу мероприятийым организоватлыме шотышто педагогический коллективын кугу опытшымат палемден кодыде ок лий».

Пӱрӧ оласе многопрофильный профессиональный колледжыште тунемше марий рвезе Иван Яметов сеҥашак шонен толын. Республикысе олимпиадыште икымше гана участвоватла гынат, нимынярат ӧрмалген ок шого. Тудым тале мастер Георгий Шамыков ямдылен. «Лӱдмаш уке - техникым сайын палем, пасуштат ик гана огыл тренироватлалтынам. Шке виемлан ӱшанем, - каласкала рвезе. - Ойырымо профессием келша. Ончыкыжым трактористлан пашам ышташ шонем».

…Пасу воктене палаткым шогалтыме. Тушто медицинский пункт верланен. Тудым Фаина Гильманшина вуйлатен. Тыштак олимпиадын участникше-влак когыльо дене шокшо чайым подыл кертыныт…

«Эстакада», прицеп дене парковатлалтмаш, шыгыр верыште савырнымаш - паша годым тракторист-влаклан тыгайым шуко гана ышташ верештеш. Но таҥасымаште, кӱкшӧ баллым погаш манын, нине упражнений-влакым ик йоҥылыш деч посна шукташ кӱлын. Икмыняр участникын ойлымыжо почеш, «змейка» нунылан эн неле лийын: конус-влак коклаште икмыняр метр гына, тиде кужытым трактор дене эрташ куштылгак огыл. Туге гынат икмыняр рвезе пеш сай результатым ончыктен.

Кугарнян олимпиадын участникше-влакым эше кок испытаний вучен. Тиде гана нуно теорий материалым, корнышто коштмо правилым палымышт шотышто тестированийым эртеныт.

Таҥасымаш ик шӱлыш дене эртен каен. Сеҥыше-влакым Мишкан тӱвыра полатыште саламленыт. Торжественный мероприятийыш кугу уна-влак толыныт. Ял озанлык министрын алмаштышыже Ляля Давлетбаева сцена гыч шуко поро мутым ойлен. БР образований министрын алмаштышыже Гулярия Ялчикаева олимпиадын участникше-влаклан ойырен налме профессийыштлан ӱшанле кодаш, илышыштышт кӱкшӧ результатыш шуаш тыланен.

Таҥасымашын результатше почеш эн тале тракторист лӱмым Мишкан агропромышленный колледжын курсантше Кирилл Александров (производственный обучений мастер А. Шамиданов) сеҥен налын. Буздяк ялозанлык колледжын тунемшыже Наиль Мухаметьянов кокымшо, Туймаза агропромышленный колледжын курсантше Эдуард Баширов кумшо верыш лектыныт.