-6 °С
Пылан
Все новости
Самырык тукым
7 Июнь 2019, 15:23
Изеҥер
Изи авторна, Юлианна Чаплыгина, Чорай марий гимназийыште кумшо классым тунем лектын. Отличница, тӱрлӧ конкурслаште вийым тергаш йӧрата. «Лига эрудитов» тӱнямбал, элысе «Поиск - 2018. Наука - это поиск истины», республикысе научно-практический конференцийлаште, районысо конкурслаште ончыл верлам наледымылан ятыр гана Чап грамот дене палемденыт. Верысе тӱвыра пӧртыш кушташ коштеш, муралташат кертеш. А эше тудо пырысым пешак йӧрата - тудыжат почешыже шӱдырнылеш. Арамлан огыл шке шонен лукмо йомаклаштыже суртвольык, янлык, кайык-влак тӱҥ герой улыт. Таче Юлианнан эше ик йомакшым да почеламутлажым лудаш темлена.
Кеҥеж
Ах, могай мотор кеҥеж!
Чоҥешта йыр лыве еш.
Кече пеш чот ырыкта,
Да мардеж пуал колта.
Мӱкш-влак ызген чоҥештат,
Кайык-влакше муралтат.
Ылыжеш пӱртӱс йырем,
Мый кеҥежлан йывыртем.
Кочаем
Лыжга, поро кочаем,
Тыйым пешак йӧратем.
Пеленем тудо шинчеш,
Йодышташ вигак пижеш.
Дневникем тудлан кондем,
Сай отметкем ончыктем.
Кочаемже куана,
Тупем гычын вӱчкалта.
Юзо полдыш
Йомак
Полдыш - илышыште изи гына тыглай арвер, а йомакыште юзо лийын кертеш. Тидын нерген мый тыланда ик йомакым каласкалынем. Шыпрак лийза, колыштса - йомак мемнан омсашке тӱкала.
Икана шоҥшо чодыраште йолгорно дене ошкылмыж годым полдышым муэш.
- Ой, мыйын у пинчакемлан могай сай пӧлек, - куана тудо.
- Но тыге сай огыл. Полдышым йомдарыше озам муаш кӱлеш, - темла ур.
- Кисан лийын огеш керт. Тудо нарынче жилетым чиен коштеш, а полдыш йошкарге, - манеш шоҥшо.
- Мераҥланат келшен огеш тол, вет тудын мыжерже ошо але сур, - шижтара ур.
- Ала тиде полдышым йошкар рывыж йомдарен? Маскан огыл гын? - малдат. Но маска денат, рывыж денат вашлиймышт шуын огыл.
Шуко шонкалаш верештын огыл. Шогертен уверым конденат шуктен.
- Тиде полдыш Вувер Куван. Да эше тыглай огыл, юзо улмаш, - каласа ӱчашыше-влаклан.
Ур ден шоҥшо куанен колтат, но пыртак шӱлыкаҥыт: юзо - тиде оҥай, но вет Вувер Кува деке кайыман. Мом ышташ? Каяш логалеш.
Вувер Кува полдышыжым ужешат, куанен шыргыжалеш:
- Тиде мыйын сарафанем гыч кӱрлын возын. - А вара поро чонан ур ден шоҥшым чоян ончалын каласа: - Мый тиде полдышым тыланда пӧлеклем. Но тудо тыглай огыл: изишак йыгалташ гын, йомакым каласкалаш тӱҥалеш.
Йолташ-влак пеш чот йывыртат. Вувер Кувалан таум каласат. Ынде кажне гана кас юж дене шӱлалташ лекмышт годым пеленышт юзо полдышым налыт, вет тудо нунылан оҥай деч оҥай йомакым каласкала.
Читайте нас:
© 2024 «Чолман». Республиканская общественно-политическая газета на марийском языке. Издается с 24 апреля 1991 г.
Главный редактор - Губаев Игорь Иванович.
При использовании материалов гиперссылка на сайт cholman.info обязательна.
Категория информационной продукции 12+
Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.
Мы в соцсетях:
ВКонтакте - vk.com/cholman
Telegram - https://t.me/cholmantv
Я.Дзен - https://dzen.ru/cholman
ОК - ok.ru/cholmanrb
TikTok - tiktok.com/@cholman.tv
Телефон
Телефон: 8(34783)7-07-97.
Электрон почто
Адрес
Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж.
Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».