Чыган куштымаш дене ӧрыктареныт

Тыршымышт арам лийын огыл - май мучаште Уфа оласе «Башкортостан» кугыжаныш концерт залыште эртыше фестиваль-конкурсын «Хореографий. Калык куштымаш» номинацийыштыже куштышо дуэт сеҥышыш лектын. Конкуренций кугу лийын - мурышо-куштышо коллектив-влак Башкортостан, Удмуртий республикыла, Тюмень, Курган областьла, Хант-Манси автономий округла гыч чумыргеныт.

«Мыланна эмоциональный, экспрессий шӱлышан куштымаш-влак келшат. Владислав дене 2013 ийыште, «Альянс» коллективыште куштымо годым, палыме лийынна. Ынде коктын дуэт семын шуаралтына. Жюриште кӱкшӧ профессионал-влак ыльыч - выступленийым пианист, композитор, актер да телевӱдышӧ, Российын калык артистше Л. Оганезов, «Зверушкины забавы» циркын художественный вуйлатышыже, Российын сулло артистше С. Куклин, И. Моисеевын лӱмжым нумалше куштышо калык ансамбльын педагог-репетиторжо Д. Орлов, «Street jazz» балетын художественный вуйлатышыже С. Мандрик, театральный режиссер К. Сбитнев, «Фабрика звезд-5» телепроектыште мурышо, «Евровидений-2005» конкурсышто Российын чапшым аралыше Н. Подольская акленыт», - каласкала Роман, Калтаса район Ӱлыл Качмаш ялеш шочын-кушшо марий рвезе.

Еш архив гыч налме фото.

Роман ден Владислав йолташыжым, моло финалистым Нефть, газ да топливный промышленность пашаеҥ-влакын профессионал пайремышт вашеш Москва оласе Самырык-влакын полатыште эртышаш «Роснефть зажигает звезды» фестивальын гала-концертше вуча. Романын яра жапше уке гаяк. Кызыт тудо магистратурышто тунемеш, диссертацийым аралаш ямдылалтеш. Тек полмезе, тыршыше рвезын пашаже ушна, а шонымашыже эреак шукталт толеш!