Тиде рвезе шкежат кӱртньӧ гыч ыштыме гай

Нефтекамск оласе машиностроительный колледжын коллективше, тыгак Краснокам район Йывангасола гыч Шаяхметовмытын ешышт, нунын палымышт таҥасымашым шӱм вургыжын эскереныт, молан манаш гын тушто Александр Шаяхметов, НМК-н кумшо курсыштыжо тунемше студент, эксперт-влак ончылно сваркын технологийжым палыме шотышто тергымашым эртыш.

А тиде - кеч-могай кӱртньӧ дене пашам ыштыме годым сваркын чыла видшым кучылт моштымаш.

«Тиде таҥасымашлан сентябрьыштак ямдылалташ тӱҥална, - каласкала производственный туныктымашын мастерже Р.З. Ахматгалиев. - Колледжыште тунемше-влак кокла гыч молан Александрым ойырен налынам? Тыршышан, чытышан, да эше кӧргӧ вий-куатше, моральный пеҥгыдылыкше дене ойыртемалтеш. Ялыште, пашаче ешыште шочын кушмыжо тудлан сайын шуаралташ йӧным ыштен».

Кодший декабрьыште тудын воспитанникше Александр Шаяхметов республикысе конкурсышто сеҥышыш лекте. Апрельыште Комсомольск-на-Амуре олаште элысе финалыш ойырен налме таҥасымаште кокымшо лие да эн-эн мастар-влакын моштымыштым аклыме «Самырык профессионал-влак» (WorldSkills Russia) национальный чемпионатыш логале.

Айдемын кертмыжым Казаньысе вич кече пеш кӱкшӧ тергымаш дене гына аклаш ок лий. Ик идалык наре ямдылалтмашат чылажымак почын ок ончыкто. Тидлан тӱҥалтыш еш илыш, койыш-шоктыш, пашалан шӱмаҥдымаш гоч пышталтеш. Марийын тукым вӱргорныштыжат кугезе-влак деч куснен толшо пашаче вий модеш. Но самырык-влак тӱрлӧ улыт. Кӧ, мутлан, шке шонымашке шуаш, тудлан эҥертыше коллективын, ешын, йолташ-влакын, чумыр калыкын ӱшанжым шукташ манын, каныш кече да пайрем годымат мастарлыкшым шуараш тырша, а весе паша арня покшелнат шканже пайремым, дискотекым да тулеч молым веле кычалеш.

Колледж вуйлатыше Р.Я. Ахметшин чумыр погынымаште тыге каласыш: «Мый шкежат Казаньыш тыгай кугу таҥасымашым ончалаш миенам ыле. Но вошт койшо пластик пырдыж гоч Сашан конкурс пашам ыштымыжым эскераш чытышем ыш сите, рашрак каласаш гын, нервем ыш чыте. Пеш кугу напряжений! Мыняр чытыш, моральный, физический вий кӱлыт! Ик жап гыч кораҥ кайышым. Но чон садак тургыжлана, уэш ончаш ошкыльым. А Саша тугак шке пашажым ыштенак ышта. Мый умылышым: тиде рвезе шкежат кӱртньӧ гыч ыштыме гай, тудо сеҥа, мемнан ӱшаннам сула! Тыге шоналтышым да изишак лыпланышым. Ӧрдыж гыч ончымаште тыге койын гын, шкенжын чоныштыжо мо озаланен? Кугу сеҥымашышке шуаш моштымаш да усталык деч посна эше кок вий кӱлеш: физический да моральный. Моральный чытыш деч посна кугу вият полшен ок сеҥе. Чытышет уло гынат, вий деч посна сеҥымашке шуаш ок лий. Кеч-могай таҥасымашыштат тыге, очыни».