МАРИЙ МАТРОС 9 МАЙЫШТЕ ЙОШКАР ПЛОЩАДЬЫСЕ ПАРАДЫШТЕ ОШКЫЛЕШ

Слава Петров Акпарс кыдалаш школ деч вара Альметьевскысе нефтяной кугыжаныш институтышто шинчымашым поген. 2018 ийыште «Предприятий ден организаций-влакын экономикышт» специальность дене вузым тунем лектын. А шыжыжлан Россий Армий радамыш налыныт. Кызыт тудо Краснознаменный Балтийский флотышто служитла. Службылан чыла шотыштат ончылгоч ямдылалтын. Школышто тунеммыж годымак кеҥежым кроссым, телым ече дене сайын куржталын, футбол дене модын. Аваже, Людмила Владимировна, изинек кап-кылым шуараш, таза илыш-йӱлам кучаш, пеҥгыде да чытышан лияш туныктен.

Мый изиэм годымак иктаж гана Москвасе Йошкар площадьыште строй дене рошткен эртыме нерген шонкаленам. Теве ынде йоча годсо шонымашем шукталтеш. Тиде триумфальный шествийлан кужу жап ямдылалтынна гынат, Йошкар площадьысе брусчаткыш тошкалме деч ончыч изишак тургыжланымаш шижалтеш. Ме сводный духовой оркестрын шоктымо марш почеш трибун воктеч кум минут коклаште строй дене эртышаш улына. Тыгай тат илышыште ӱмырешлан шарнаш кодеш, шонем», - каласкален гвардийын матросшо аважлан телефон дене мутланыме годым.

Россий Федерацийын Оборона министерствыже 9 майысе парадыште кайышаш рвезе-влаклан «За участие в военном параде в День Победы» ведомственный медальым, теҥыз пехотинец-влакын «Тайфун» Всероссийский мер организацийышт «Участнику парада Победы» шарнымаш знакым кучыктеныт.

Каласыман, Акпарс ял гыч Сеҥымаш парадыш тылеч ончыч эше Родион Атнабаев логалын ыле. Ынде ялысе вес тыглай рвезынат йоча годсо шонымашыже шукталтеш.

Парад деч вара Слава уэш войсковой частьышкыже пӧртылеш. Тудлан умбакыже служитлыман. Мӧҥгыштыжӧ сайын служитлен пӧртылмыжым Акпарс кыдалаш школышто тунемше Юлия ден Валерия шӱжарже-влак да аваже вучат.