Изинек десантник лияш шонен

Школышто тунемше да туныктышо-влак тудын дене вашлиймашым чон вургыж вученыт, вет Вася пел ий ончыч гына мемнан коклаште лийын: «4» да «5»-лан тунемын, олимпиадылаште, конкурслаште, школышто эртарыме чыла мероприятийыште чолгалыкым ончыктен. Спорт дене пеҥгыде кылым кучен. Куржмаште, ече дене таҥасымаште, баскетбол да волейбол дене модмаште, спорт ориентирований дене школын чапшым арален да шуко гана сеҥыше радамыш логалын. Икманаш, школыштак ойырен налме военный училищыш тунемаш пураш ямдылалтын, вет чонжо дене изинек, эше парт коклаште шинчымыж годымак, десантник лияш шонен.

Сентябрь тӳҥалтыште тунемаш пурышо-влак, кок кече йолын ошкылын, Рязань олашке пуреныт. Нунын вачыштышт курсант погон волгалтын. 8 сентябрьыште присяга лийын. Васям ачаж ден аваже саламлаш миеныт. Тыматле, пеҥгыде койыш-шоктышан, ушан-шотан, тыршышан, поро кумылан рвезым ончен куштымыштлан эн ончыч ава-ачажлан, Татьяна Павловналан да Гавриил Николаевичлан, кугу таум каласыман.

Школышто вашлиймашым школ директор Г.В. Ибатов почо. ЕГЭ-ште обществознаний, физика, руш йылме, математика дене Васян сай шинчымашым ончыктымыжо да шуко баллым погымыж нерген ойлыш. Школышто тыршен тунеммын, спорт дене кылым кучымын кӳлешлыкышт нерген каласкалыш. «Кажне айдеме шке ончыланже могай-гынат цельым шында да тудым шуктышаш верч чыла ышта. Василий кызытлан шке ончыланже шындыме цельыш шуын», - иктешлен каласыш школ директор.

Тений Рязанский военный училищым почмылан 100 ий темме лӳмеш КМБ-ым эртыше ӳдыр-эрге-влакым документальный кинолентыш сниматленыт, да 17 ноябрьыште НТВ телеканал «Смотр» передачым ончыктен. Тиде передачым вашлиймаште меат ик шӳлыш дене ончышна, чылан Васян чурийжым кычална да ужна. Тидлан мучашдымын куанышна!

Василий дечат тӱрлӧ нерген йодыштыч.

- Тунемаш йöсö мо? Режимда могай?

- Тунеммаште неле гын, варажым куштылго лиеш, - пеҥгыдын каласыш курсант. - Яра жап уке, кажне минут шотлалтын, чыла вере дисциплина озалана.

- Иктаж марий рвезым вашлийыч ала?

- Марий Элысе Волжск ола гыч ик рвезе дене палыме лийым.

- Башкирий гыч тунемаш мийыше-влакат улыт?

- Мый денем пырля Уфа да Нефтекамск олала гыч кок рвезе тунемеш.

- Мыняр гана парашют дене тöрштен шуктышыч? Лӳдмашан мо?

- Вич гана. Чылалан тунемат…

Вашлиймашым шарнен илаш школнан ончычсо выпускникше, генерал-майор, военный наука доктор

М.И. Беловын «И вечный бой…» книгажым пöлеклышт да Василийлан шуко поро тыланымашым каласышт. Школнан туныктышыжо М.А. Шамратов воздушно-десантный войскам кужу жап вуйлатыше В.Ф. Маргеловын ойжым ушештарыш: «Кö Рязанский воздушно-десантный училищым тунем пытара, маршалын погонжо огыл гынат, генералын погонжо волгалтеш». Василият шке ончылныжо шындыме цельыш шуэш, да ончыкылык корныжо волгыдо да пиалан лиеш манын ӱшаныме шуэш.

Школышто эртарыме тыгай вашлиймаш-влак кужу жаплан ушеш кодыт да икшыве-влакым шуарымаште, воспитатлымаште кугу верым налын шогат.