Усталык шӱлышан нефтяник

Калтаса район Ӱлыл Качмаш ялын шочшыжо, марий шӱлышан рвезе Роман Искибаев теният Москваште кандашымше гана эртарыме «Роснефть зажигает звезды» конкурсышто усталыкшым ончыктен. Фестивальыште нефть да газ промышленность отрасльыште тыршыше коллектив-влак куштымо да мурымо мастарлыкыште ӱчашеныт. Романын коллективше - А. Култышеван вуйлатыме «Руны» мурышо фольклор ансамбль - жюрилан куштымаш элементан «Шошымсо модмаш-влак» хороводым аклаш темлен. Тыршымышт арам лийын огыл - коллективым «Калык вокал» номинацийыште кокымшо вер дене палемденыт.

Роман кызыт Нижневартовск олаште «Самотлорнефтегаз» компанийыште тӱҥ инженерлан пашам ышта.

Л. ШАВАЛИЕВА.