Верыште шинчылташ йокрок. Тӱням ончал савырныман!

Кеҥеж - йомартле пагыт. Тудым самырык-влак кугурак ийготан-влак дечат чотрак йӧратат докан, вет лач ты жапыште нунылан шуко тӱрлӧ йӧн почылтеш. Адакше эше еш да озанлык нерген шонкалышашышт укеат, кушко шонат, тушко корным кучат. Кызытсе самырык-влаклан порын кӧранаш лиеш - нуно ӧрын, лӱдын, вожыл шогышо огытыл, могай йӧн уло, чылажымат пайдалыш савыраш тыршат.

У палымем, Мишкан районысо Йылыш ялеш шочын-кушшо, кызыт Башкир кугыжаныш университетыште романо-германский факультетыште тунемше Дарья Саликаеват чолга койыш дене ойыртемалтеш. Тений кеҥежым пайдалын эртараш шонен пыштен да Турцийыш «шикшалтын». Но моло еҥ семын кече йымалне шыранен кияш, йӱштылаш да йот элым ужын кошташ гына огыл, тусо икшыве-влакым калыкнан, элнан культурыж дене палдараш.

Дарья Турцийыш AIESEC тӱнямбал коммерческий огыл эрыкан организацийын проектше почеш логалын. Самырык-влакын виктарыме организаций 1948 ийыште шочын да 126 эл мучко, 1989 ий гыч Российыштат шарлен. Тудо 18-29 ияш ӱдыр-рвезе-влакым тӱрлӧ проектыш ушнаш, тыге лидер койышым, профессионал мастарлыкым вияҥден колташ, илышым саемдаш тыршаш кумылаҥда.

Д. Саликаева «Тӱнямбал волонтер» программым ойырен налын, проектше «Тӱнямбал йочасад» маналтын. Ӱдыр тылзат пеле Денизли олаште илен да кажне арнян кум кече йочасадыш коштшо икшыве-влак дене пашам ыштен. Англичанла пешыже кутырен моштыдымо ӱдыр-рвезе-влакым модыктен да тыгодымак руш да марий калык-влакын культурышт дене палдараш тыршен. Волонтер-влаклан оксам огыт тӱлӧ, но илаш верым пуат да пукшат-йӱктат. Дарьям турок еш ашнаш налын. «Турцийыш миен коштмемын пайдаже кугу лие, - ойла ӱдыр. - Тӱҥжӧ - тыге англичанла сайынрак мутланаш тунемалтеш. Турок да моло йылмыласе мут-влакымат ушеш шыҥдараш тыршенам. Вес элысе у еҥ-влак дене, ятыр калыкын культурыж дене палыме лийым. Мый денем пырля Пакистан, Индонезий, Румыний, Тунис, Алжир, Китай да моло элла гыч мийыше ӱдыр-рвезе-влак пашам ыштеныт.

Вес элысе сӧрал верлам ончен коштын, тусо илышым шке шинчам денак ужын, мыланем мо кӱлмым умылышым, шкаланем у цельым шындыме нерген шонаш тӱҥальым. Ончыкыжо эшеат шукырак элым ужнем, вияҥнем. Вес программа почешат иктаж элыш миен толаш кумыл уло, вет AIESEC организаций тӱрлӧ программым темла. Южо элыште пашадарымат тӱлат, но тидлан англичан йылмым пеш сайын палыман. Вес могырым, пелен ачий-авий уке годым чыла проблемым шке решатлаш тунемат. Кӱчык жапыште тич шинчымашым да шарнымашым погенам. Чыла самырыклан каласымем шуэш - верыште ида шинчылт, тӱнямбалсе эл-влакым ужын коштса, мом-гынат пайдалым ыштыза. Тидлан тӱрлӧ йӧным верешташ лиеш!»

Э. АПТУЛМАНОВА.

Снимкыште: Дарья у йолташыже-влак коклаште марий тувыр дене ковыралана.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».