У кӱкшытыш шу тый, турист!

1-8 августышто Краснодар крайыште самырык турист-влакын всероссийский слетышт эртен. Тудо тений элысе ешартыш образований системылан шӱдӧ ий теммылан пӧлеклалтын. Слетым Россий Федерацийын Образований да наука министерствыже, тыгак Йоча да самырык-влаклан федерал туризм ден краеведений рӱдер ямдыленыт. Россий кӱкшытан форумын программыже моткоч оҥай да поян лийын: вуеш шудымо ийготан ӱдыр-рвезе-влак кросс-походыш коштыныт, вӱдысӧ туризмыште таҥасеныт, скалолазанийыште, мультигонкышто, спорт ориентированийыште вийыштым тергеныт, туризм дене кылдалтше фото- да видеоролик конкурсышто ӱчашеныт.

Всероссийский слетышто Башкортостан Республикын командыжат вийжым терген. Кундемын чапшым аралаш Нефтекамск ола гыч «Штурм» туризм рӱдерыште шуаралтше ӱдыр-рвезе-влаклан ӱшаненыт. Чолга ӱдыр-рвезе-влак коклаште марий рвезынат лӱмжӧ уло. Павел Пашкин оласе 11-ше школышто 9-ше классыште тунемеш, туризм дене кум ий наре заниматла. «Штурм» рӱдерын командыже кундемыште эртарыме таҥасымашлаштат эре ончылно улеш, мутлан, июньышто Белорецкыште эртыше «Лӱдыкшыдымылык школ» республикысе таҥасымашыште икымше, Мишкан селасе турфестыште кокымшо верым налын.

Таче, 8-ше августышто, Самырык турист-влакын всероссийский слетышт пашажым мучашла. Нефтекамск олан командыже Краснодар край гыч у сеҥымаш да у вий-куат дене пӧртылеш манын ӱшанена.

Л. ШАВАЛИЕВА.

Снимкыште: Туристын кажне кечыже оҥайын эрта. Нефтекамск олан командыже Мишкан районысо турфестыште.