Слет пайдалын эртыш

Тушко чолга самырык ӱдыр-рвезе-влак Российын тӱрлӧ кундемлаже - Марий Эл, Пошкырт, Татарстан, Одо республикыла, Пермь, Свердловск областьла, тыгак Санкт-Петербург, Озаҥ олала гыч миеныт. Слет Российыште увертарыме Волонтер идалыклан пӧлеклалтын. Программыже моткоч оҥай да поян ыле. Слет жапыште ме, самырык-влак, кумдан палыме марий шанче, тӱвыра, пашаеҥ-влакын лудмо «Марий калыкын вашполыш койышыжо», «Марий калыкын сарзе сымыктышыже», «Ялысе туризм», «Марий калыкын ойӧрыжӧ», «Марий историй археологын шинчаж дене» лекций-мутланымашлаште уш-акылнам пойдарышна, кугыжаныш, марий мер пашаеҥ, шанчызе, мурызо, поэт-влак дене вашлийна. Йыван Кырлан шочмо-кушмо Купсола ялышкыже, «Лукоз» казам ончышо озанлыкыш, Шернур районысо краеведений да моло тоштерыш экскурсий дене мийымаш, КВН модыш сай шарнымашым кодышт. А Марисола ял воктенсе чодыраште спорт ориентирований дене таҥасымаш, ерыште катамаран дене коштмаш тазалыкым шуараш полшышт.

Пошкырт кундемын чапшым луымшо Марий самырыктукым слетышто Караидель район гыч А. Ибулаев, Янаул район гыч Е. Гильмитдинова,

И. Дмитриева, Д. Кипирянова, Калтаса район гыч Р. Бикбатыров, С. Байгузин, Мишкан район гыч Н. Кошиева, С. Кугубаева, А. Ишпахтин, К. Шамсутдинова, Нуриман район гыч К. Адылбаева да Нефтекамск ола гыч тиде корнылан авторжо араленыт.

Л. ШАВАЛИЕВА.

Снимкыште: Пошкырт кундемын делегацийже «Российысе марий-влакын калыкле-тӱвыра автономийышт» мер организацийын Советшым вуйлатыше Л. Яковлева дене пырля.