Самырык эколог-влакын шинчымашышт келге

Башкортостанын командыштыже республикысе да элысе олимпиадылаште сеҥыше тунемше-влак Валентина Кривко, Динислам Ахмаев, Евгения Афанасьева, Аяз Гареев да Демид Климец лийыныт. Тудым Шаран районысо Мичуринск селасе

М. Фархутдинов лӱмеш школ гыч марий туныктышо В.Т. Акбулатов вуйлатен. Владислав Тимирянович - кугу паша опытан туныктышо. Тудын ямдылыме ӱдыр-рвезе-влак ик гана веле огыл тӱрлӧ кӱкшытан таҥасымашла гыч сеҥымаш дене пӧртылыныт, шкежат кок гана Российысе эн сай туныктышо-влак радамыш логалын.

Конкурсыш ушнышо ӱдыр-рвезе-влаклан «Мо? Кушто? Кунам?» модыш семын эртарыме теорий турышто, «Гидробиологий», «Ботаника», «Энтомологий», «Орнитологий», «Почвоведений» направленийла дене шинчымашым почын пуаш, эксперт-влакын заданийыштым шукташ, пӱртӱс лоҥгаште шке моштымашым ончыкташ логалын.

Башкортостанын командыже тӱҥалтыш гычак сай велым ойыртемалтын да чумыр ончымаште сеҥышыш лектын. Евгения Афанасьева «Орнитологий», Валентина Кривко «Энтомологий» дене икымше, Аяз Гареев «Гидробиологий» направлений дене кокымшо верлам налыныт. Эн ушан да опытан команда семын нунылан Белоруссийыште «Границыдыме экологий» тӱнямбал конкурсышто элнан чапшым аралаш ӱшаненыт.