Самырык тукым да села. Каяш але кодаш?

«Форум селам, селаште илыше самырык-влакын илышыштым саемдыме, тидын шотышто кугыжаныш политикым вияҥдыме, селаште илымын да пашам ыштымын престижыштым нӧлталме, ончыл паша опытым иктешлыме шонымаш дене эртаралтын. Тудым Российын селалаштыже илыше самырык-влакын общероссийский мер ушемышт ямдылен. Конкурсым эртараш РФ Советын Аграрно-продовольственный политика да пӱртӱс дене пайдаланыме шотышто комитетше полшен. Конкурсыш чылаже 1300 утла самырык еҥ ушнен.

Форум жапыште ме Селасе самырык-влакын Российысе мер ушемыштын пашаж дене палыме лийна, «Селаште сай образованийым налмаш - тиде миф але амбициозный шонымаш?», «Цифровой имидж», «Социальный проектым социальный сеть полшымо дене илышыш шыҥдарымаш» тренинглаште уш-акылнам шуарышна, селам вияҥдыме нерген «йыргешке ӱстел» йыр мутланышна. Мыланна, Российын тӱрлӧ кундемлаж гыч чумыргышо самырык-влаклан, тӱкан кугу вольыкын голштинский урлыкшым ончышо, шӧрым ятыр лӱштен налме дене сай лектышыш шушо «Первомайский» племенной заводыш экскурсийым эртарышт. А элнан йӱдвел рӱдолажын, Санкт-Петербургын, моторлыкшо - Петропавловский крепость, Зимний дворец, «ош йӱдын» сӧраллыкышт - чонемлан мондалтдыме шарнымашым пӧлеклышт».