Шочмо кундемын ончыкылыкшо - самырык-влакын кидыште

13-15 апрельыште элын тӱрлӧ кундемлаштыже илыше чолга самырык ӱдыр-рвезе-влак Москваште «Пространство развития» форумыш чумыргеныт. Тиде проектым Российысе Самырык-влакын ушемышт ямдылен. Тудо Россий Федерацийын изирак олала ден поселенийлаштыже илыше чолга самырык ӱдыр-рвезе-влаклан шке командыштым чумыраш да пашаштым виктараш туныктымо шонымаш дене эртаралтын. Проектыш ушнаш Россий Федерацийын 76 регионжо гыч 813 йодмаш пурен. Конкурс почеш тушко Российын 42 кундемысе 50 тӱжем деч шагалрак еҥ илыман 90 населенный пункт гыч 18-30 ияш 100 самырык ӱдыр-рвезым ойырен налыныт. Мишкан села гыч нунын коклашке логалше В. Янгуатова форумыш миен коштмыж нерген каласкала.

Кум кече жапыште самырык-влак шке кундемлаштышт социально значимый проектыштым илышыш шыҥдарашлан кӱлешан шинчымаш ден моштымашым налыныт. Форумышто нуно Президент грантым пуышо фондын генеральный директоржо И.В. Чукалин, Российысе Самырык-влакын ушемыштым вуйлатыше П.П. Красноруцкий да моло лӱмлӧ еҥ-влак дене вашлийыныт, тыгак эксперт-влак дене пырля грантым налме, изирак ола ден поселений-влаклан полышым пуымо, Российысе самырык-влак ушемын пашашкыже кузе ушнымо дене кылдалтше йодыш-влакым лончыленыт.

Форум моткоч сай шарнымашым кодыш. Тудо изирак ола, села, поселкышто илыше самырык тукымлан шке кундемжым, йырысе вер-шӧржым шкаланжат, молыланат эшеат сайракым ышташ, шуаралташ йӧным пуа. Ме, кугу элнан тӱрлӧ лукыштыжо илыше, тӱрлӧ койыш-шоктышан, тӱрлӧ ийготан, тӱрлӧ усталыкан, пашаште тӱрлӧ сеҥымашыш шушо самырык-влак, форумын пашашкыже куштылгын да ик еш семын ушненна. Форумлан кӧра мый вучымо шонымашемым илышыш шыҥдарен кертынам - икымше гана Москвм ужынам. Тидым, конешне, нигунам ом мондо. Икымше гана Йошкар Площадьыште, 1812-шо ийысе Отечественный сарын историй тоштерыштыже, Арбатыште, метрошто лийынам, Москва-Ситим ужынам. Тылеч посна, мый шуко самырык ӱдыр-рвезе дене палыме лийынам, ятыр йолташым муынам. Ончылно мемнам команда дене пырля ышташ лийме куштылго огыл паша вуча.

Форумым Россий Федераций Президентын грантше кӱшеш эртарыме, тыгак Самырык-влакын пашашт шотышто федерал агентствын, РФ Общественный палатын, «Российысе студент-влакын ушемышт» мер толкын полшеныт.

Туддеч вара команде-влак, Образовательный школышто тунеммашым эртен, проектыштым шке кундемлаштышт илышыш шыҥдарен кертыт.

Снимкыште: Занятийыште.