Куржын, курыкымат сеҥен кертын

Нефтекамск оласе колледжлаште але техникумлаште тунемше марий самырык ӱдыр-рвезе-влакын я художественный самодеятельность конкурсышто, я спорт таҥасымаште сай кӱкшытыш шумышт шотышто лӱмнерыштым чӱчкыдынак колаш верештеш. Тиде кечылаште, мутлан, Нефтекамск машиностроительный колледжын тунемшыже Владислав Яндыганов спортышто сеҥымашыж дене ӧрыктарыш. Тудо Ставропольский крайысе куштылго атлетика дене эртыше таҥасымаште, рашынже курыкан вер-шӧрыштӧ куржталмаште, сай лектышым ончыктен да спорт мастерыш кандидатлык нормативым темен.

А тымарте спортлан шӱман рвезе 24 мартыште Кисловодск олаште эртыше Российын Кубокшылан таҥасымаште (кум километрым куржын) 7-ше верым, а 31 мартыште дене Железноводск оласе Бештау курык воктене эртыше Российын Чемпионатыштыже шым километрым куржмаште 4-ше верым налын. Тиде таҥасымашыш логалмаш Владиславлан куштылгын пуалтын огыл - тидлан шкем эн ондак республика кӱкшытыштӧ сайын ончыкташ кӱлын. Рвезе тидым ыштен кертын - Мелеуз олаште лийше куштылго атлетика дене Башкортостанын первенствыштыже 6 километрым куржын, эн писе улмыжым ончыктен. Тыге рвезым Башкирийын сборный командышкыже налыныт.

Владислав шкеже Мишкан район Токтар ялеш шочын-кушын. Кызыт Нефтекамск машиностроительный колледжын 3-шо курсыштыжо тунемеш, «Пожарная безопасность» специальностьым налаш ямдылалтеш. Куштылго атлетика - тудын йӧратыме пашаже, ӱшанле йолташыже. «Яра жапем йӧршын уке. Занятий деч вара вигак тренировкыш каем. Куштылго атлетика дене вич ий наре заниматлем. 8-ше классыште мыйым йолташем-влак Соказа ялыш тренер дек ӱжын наҥгайышт. Лач тушто гына пален нальым, мо тугай куштылго атлетика. Икымше тренерем Соказа ял гыч Юрий Байгузинович Айгузин ыле. Тудо мыйым туныктыш, шуко вере куржталаш кондыштарыш», - каласкала чолга марий рвезе. А кызыт рвезым тренер семын Павел Владимирович Кокин, 2000 ийысе Олимпийский модмашын участникше, шуара.

Владиславлан ончыкыжат спортын у кӱкшытышкыжӧ шуаш тыланена!

Л. ШАВАЛИЕВА.

Снимкыште: В. Яндыганов шола гыч нылымше.

Еш архив гыч налме фото.