Спортым да шочмо йылмым йӧрата

Март тӱҥалтыште Нефтекамск оласе школлаште тунемше ӱдыр-рвезе-влак коклаште многоборье дене (кужытыш тӧрштымаш, кӱчык да кужу дистанцийыш куржмаш) таҥасымаш-влак эртеныт. 10-шо школын 4 классыштыже тунемше Н. Ершова шке ийготан-влак коклаште икымше верым налын.

Каласаш кӱлеш, чулым марий ӱдырын тиде сеҥымашыже икымше огыл. Тулеч изиш ончычрак, февраль мучаште, Настя Нефтекамск олаште эртыше республика кӱкшытан таҥасымашыште 60 метрыш куржмаште икымше, 1000 метрыш куржмаште кокымшо лийын. Тудо кечылаштак ӱдыр Татарстан Республикысе Уруссу олаште куштылго атлетика дене Всероссийский таҥасымашыште 2006-2007-ше ийыште шочшо йоча-влак коклаште угыч чылам ончылтен. Ӱдырым спортлан аваже, 10-шо школышто физкультурым туныктышо А. Ершова кумылаҥда, Татарстаныш Нефтекамск олан командыжымат тудак намиен.

Л. ШАВАЛИЕВА.