Йӧратыше мужырлан - кинотеатрыш ӱжмаш

Лач тыгаяк шомакла дене шукерте огыл У Пураял клубышто Шнуй Валентинын кечыже лӱмеш модыш программым эртарышна.

Самырык-влак клубыш ятыр погыненыт ыле. Конкурсышто ӱчашаш кумылан-влакат ситышын ыльыч. «Шаланыше» шӱм-влакым ушен, икте-весым кычал муын, икмыняр «йӧратыше» мужырым верештна. Тыге нуно кас мучко тӱрлӧ конкурсышто чолгалыкым ончыктышт. Рвезе-влак «йӧратыме» ӱдырыштлан вашкӱзӧ деч посна шӱдырым «пӱчкыч», нунылан ямдылыме пӧлекым: рестораныш ӱжмашым, косметичкым, циркыш билетым, норко шубым, автомобильым, пырысигым - жест да мимике дене умылтарышт, а ӱдыр-влак нунылан умшаш пурлмо изи совла гыч мороженыйым пукшышт. Мучаште мужыр-влак сем почеш тӱрлӧ куштымашым ончыктышт. Чыла мужыр заданий-влакым шуктен сеҥен.

Эн йӧратыше мужыр семын жюри Нефтекамск машиностроительный колледжын студентше В. Умутбаева ден Йӱдвел кундемыште пашам ыштыше И. Шараевым ойырыш. Пӧлек шотеш нунылан «Арсенал» кинотеатрыш мияш сертификатым кучыктыш.

Л. ШАМШУКОВА, У Пураял тӱвыра пӧртым вуйлатыше.