Кеҥеж канышлан ямдылалтыт

Кок кечыжат пайдале да оҥай лийын. Организатор-влак «йыргешке ӱстел» йыр мутланымашым, мастер-класс-влакым ямдыленыт, вожатый-влаклан шке моштымашыштым кумданрак почын пуаш йӧным ыштеныт. «Старт» лагерьын командыжат ойыртемалтын: Д. Сайпушева почеламутым сылнын каласкален, Л. Хабирова кузе кушташ туныктымо дене палдарен, В. Янгуатова «Геймтаун - модыш тӱня» конкурсым мастарын ончыктен. Конкурс-влакым иктешлыме почеш нунылан кум номинацийыште 3-шо степенян дипломым кучыктеныт.

«Форумышто поро шӱлыш озаланен. Организатор-влак программым вожатый-влаклан икте-весе дене палыме лияш, пашашт дене палдараш, у шинчымашым да моштымашым ешараш лийже манын чоҥеныт. Мыланем форум эн ончычак икоян, мыйын гаяк пашам шуктышо еҥ-влак дене вашлиймаш дене шарнаш кодо. Тыгай пайдале вашкыл вий-куатым ешара. Мемнанат ушыштына у идей-влак шочыч, нуным тений кеҥежым илышыш шыҥдараш тӱҥалнена. Мемнан шонымаште, вожатый шкежат чолга лийшаш, шинчымашыжым эре пойдарышаш, у технологий-влакым сайын палышаш», - каласкалыш кодший Сочиш Самырык да студент-влакын XIX Тӱнямбал фестивальышкышт мийыше Валентина Янгуатова.

Кеҥеж каныш марте шукат кодын огыл. Икмыняр тылзе гыч «Старт» лагерь уэш йоча-влакым вашлиеш. Нунын дене пашам ышташ кумылан студент-влакым шкенжын келшен илыше вожатыйже-влак тӱшкаш ушнаш ӱжеш. Кумылан-влак, тыгак икшывыштым канаш колташ шонышо еҥ-влак «Старт» лагерьын директоржылан да образований Мишкан пӧлкаш кеҥеж канышлан вуйын шогышо специалистлан йыҥгыртен кертыт.

Э. АПТУЛМАНОВА.

Снимкыште: «Старт» лагерьын командыже.