Самырык профессионал-влак таҥасат

Уфаште «ВДНХ-Экспо» выставка комплексыште да эше 13 площадкыште - Уфаште, Белебейыште, Нефтекамскыште, Стерлитамакыште, Сибайыште - «Самырык профессионал-влак» III Региональный чемпионат эртен. Тений виш форматан улмыжлан кӧра тушто Московский, Астраханский, Свердловский, Ярославский область-влак да Татарстан Республика гыч толшо студент-влакат шке мастарлыкыштым ончыктен кертыныт.

Региональный этапыште 37 профессий дене: плиткым оптымаш, туризм, отельыште администратор сомылым шуктымаш, флористика, графический дизайн, тӱҥалтыш класслаште туныктымаш да молат - таҥасеныт. Вес ий чемпионатлан 42 профессийым ойырен налаш шонат. Тидыже самырык ӱдыр-рвезе-влакым пашазе ешыш ушнаш, студент годымак келге шинчымашым погаш, чолгалык дене ойыртемалташ утларак кумылаҥаш полшышаш.

«Самырык профессионал-влак» региональный чемпионатыште сеҥыше-влак ончыкыжым сайлыме турышто вийыштым тергат, тушеч «Самырык профессионал-влак» VI Национальный чемпионатыш логалашат йӧнышт уло, палдарен Республикысе образований системын ресурс рӱдержым вуйлатыше И. Косолапова.

Э. АЛЕКСЕЕВА.