Интернетым яндар юж алмаштен

28 январьыште республикысе калык Интернет деч посна илыме кечым палемдыш. Уфа, Октябрьский, Агидель, Бирск, Янаул да моло олалаште илыше тӱрлӧ ийготан ӱдыр-рвезе-влак яндар южышто зарядкым ыштеныт, спорт таҥасымашыште кап-кылым лывыртеныт. Вичкыж да йӱштырак мардеж Нефтекамск оласе калыкымат нимыняр лӱдыктен огыл - йырым-йыр шергылтше весела сем да вӱдышӧ-влакын тарванылаш ӱжмышт почеш изижат-кугужат телымсе оҥай конкурсыш, флешмобыш уло кумылын ушненыт, портышкемым чиен, хоккей дене модыныт да, эн тӱҥжӧ, икте-весе дене социальный сетьыште огыл, а вашлийын, шинчаваш ужын мутланеныт.

Л. ГРИГОРЬЕВА.

Снимкыште: Компьютер ончылно шинчыме олмеш лучо йолташ-влак дене вашлияш!

«Neftcity.ru» сайт гыч налме фото.