Москомат ужын, шкенжымат ончыктен

Москваште эртыше конкурсыш Башкортостан гыч мийыше индеш йоча коклаште Мишкан район Нерге школын 10-шо классыштыже тунемше Алиса Иликбаеват лийын. «Икымше кечын мемнам Йоча да самырык-влаклан туризм да краеведенийын федерал рӱдерыштыже вераҥдышт. Тиде кечынак конкурсым почыч. Тудын участникше-влак шке мастарлыкыштым ончыктышт - мурышт, куштышт, шке возымо почеламутыштым ойлышт. Мый Н. Помяловскийын «Очерки Бурсы» повесть гыч ужашым лудым, - шарналтен каласкала Алиса. - Кокымшо кечын пашанам аралышна, мастер-классыште лийна, жюри сылнымут произведенийнам аклыш. Кажне кечын мыланна экскурсийым эртареныт. Ме «Ший курым» музейыште, Лермонтовын музей-пӧртыштыжӧ лийна. Ты конкурсышто усталыкем ончыктен кертмемлан моткоч куаненам. Тудо мыланна у йолташым муаш, у пашалан тунемаш да моло уста йоча-влакын мастарлыкыштым ужаш йӧным пуэн».

Тиде конкурс деч вара Алисан сеҥымаш папкыже «Конкурс художественных программ» номинацийын лауреатше лӱмым пеҥгыдемдыше грамот да «Литературное творчество» секцийын дипломжо дене пойдаралтын.

Е. МАТВЕЕВА.