Сочиште тӱнямбал фестивальыште лийыныт

12-24 октябрь кечылаште уло тӱня Сочи олаште эртыше событий-влакым тӱткын эскерен. Тушто, Шем теҥыз серысе Олимпийский паркыште, Самырык да студент-влакын XIX тӱнямбал фестивальышт эртен.

Кугу форумыш тӱнямбалсе элла гыч 25 000 наре ӱдыр-рвезе чумырген. Башкортостан Республика гыч 200 делегат миен. Тиде чолга студент, тӱрлӧ сферыште тыршыше да пашаште сеҥымашыш шушо самырык специалист, блогер да талантан журналист, шке оҥай проектыштым илышыш

шыҥдарыше тале ӱдыр-рвезе-влак. Фестивальыш логалаш нуно чылан пеҥгыде йодмашан конкурсым эртеныт. Фестивальыш кайыме-толмо корным, илымым, мероприятийлаште мастарлыкым шуарыме занятийлам организатор-влак чыла шке ӱмбакышт налыныт. Тӱнямбал кӱкшытан кугу форумышто марий ӱдыр-рвезе-влакат лийыныт. Башкортостан Республикысе марий самырык-влакын чапыштым Мишкан села гыч В. Янгуатова, тыгак Нефтекамск оласе Машиностроительный колледжын студентше, Янаул район Тошто Шуадымучаш ялын шочшыжо Ф. Тимиров араленыт. Тӱнямбал форум нунылан могай шарнымашым коден?

В. ЯНГУАТОВА: Впечатлений моткоч куанле. Тунар чот келшыш чылажат. Ме Олимпийский паркыште верланыше отельын йӧнан номерлаштыже илышна. 2014-ше ийысе Олимпиада годым спортсмен-влакат тушто иленыт. Теҥыз воктенак ыле. Образовательный площадкылаш мемнам шатл - комфортабельный автобус-влак - кондыштареныт. Нуно тӱҥ объект-влак коклаште кажне 10-15 минут еда коштыныт. Форумыш мийыше чыла делегатлан стильный форман вургемым пуэныт. Экипировка тӱрлӧ ыле - игечылан келшышын вашталтыл чиенна. Кажне участниклан организатор-влак фестиваль символикан смартфоным пӧлеклышт, фестивальыште лийме жаплан тугок мутланаш сим-картым шалатышт, Диснейленд дене таҥастарыме оҥай аттракцион-влак верланыме Сочи-Паркыш мияш билетым кучыктышт.

Спорт, культура, образований, наука да моло направлений дене ямдылыме программа моткоч поян ыле. Участник-влаклан Спортивный автомобиль, Ретро автомобиль музей-влак пашам ыштеныт. Делегат-влак яра жапыште ГТО нормым сдатленыт, футбол да баскетбол таҥасымашлаште ӱчашеныт, россий художественный фильм-влакын премьерыштым онченыт, кастене дискотекыште, концертлаште каналтеныт. Но, конешне, кугу шарнымашым кумдан палыме «шӱдыр», политик, актер, режиссер-влак - В.В. Путин, С. Лавров, Н. Вуйчич, Т. Канделаки, И. Слуцкая, Е. Исинбаева, Ф. Бондарчук, С. Безруков, Е. Дружинин - дене вашлиймаш-влак коденыт. Фестиваль мылам моткоч пайдале лийын - мый палыме спикер-влакын эртарыме тӱрлӧ лекцийлаште шуаралтынам, оҥай выставкылаште лийынам, Российысе да йот элла гыч толшо ятыр делегат дене палыме лийынам. Выставкыште шер гыч ямдылыме пашам-влакымат ончыктенам. Фестивальым мучашлыме церемоният келшен.

Ф. ТИМИРОВ: Мый республикысе World Skills чемпионатыште вием тергенам да сай лектышым ончыктенам, садланак тиде форумыш логалынам. Сочисе фестивальыште мастарлыкым ончыкташ мыланна лӱмын программым ямдыленыт. Тудын дене келшышын, ме шкенан проектнам араленна. Яра жапыште «Роза хутор» комплексыш коштынна. Российысе кумдан палыме еҥ-влакын лекцийыштым колышташ оҥай ыле. Мый тиде тӱнямбал фестивальыште ушан, кумда шинчаончалтышан шуко самырык ӱдыр-рвезе дене палыме лийынам, шинчымашем келгемденам. Форумышто лиймаш мылам моткоч пайдале ыле. Адакшым тыгай йӧн кажнылан ок верешт.

Л. ШАВАЛИЕВА.

Снимкыште:

1. В. Янгуатова (покшелне) у йолташ-влак дене пырля.

2. Ф. Тимиров.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».