Этнофорумышто марий сем йоҥген

Тудым «Башкортостан Республикысе самырык-влакын землячествышт» мер ушем да республикысе Калык-влак келшымаш пӧрт ямдыленыт. Лагерь калык-влак кокласе кылым пеҥгыдемдыме, самырык-влакын инициативыштым, усталыкыштым вияҥдыме, кундемыште илыше калык-влакын историйышт, илыш-йӱлашт нерген шинчымашым келгемдыме шонымаш дене эртаралтын. Форумыш мемнан республика гыч веле огыл, тыгак пошкудо Челябинск, Оренбург оластьла, Пермь край гыч 200 наре студент, мер ушем-влакын активистышт чумырген. Кум кече жапыште самырык ӱдыр, рвезе-влак этнотуризм дене кылдалтше лекцийым колыштыныт, тренинглаште шуаралтыныт, проект пашам ямдылаш тунемыныт. Погынымашын кокымшо ужашыштыже нуно тӱрлӧ калыкын йӱлаж дене лишкырак палыме лийыныт - калык вургемыштым чиен онченыт, тӱвыраштым шымленыт, пикш дене лӱйкалыме да моло мастер-классыште лийыныт, калык семӱзгар-влак дене шоктеныт, тӱрлӧ оҥай пашалан тунемыныт.

Этнофорумыш чумыргышо самырык-влак марий калыкын духовный поянлыкше денат палыме лийыныт. Марий калыкын поян музык тӱняж нерген форумын участникше-влаклан Мишкан селасе Марий историй да тӱвыра рӱдерын тӱҥ специалистше А. Ибулаев ден Мишкан тӱвыра пӧртын художественный вуйлатышыже Н. Кошиева каласкаленыт. Алексей самырык ӱдыр-рвезе-влаклан олым шӱвырым ышташ туныктымо мастер-классым эртарен.

Л. ШАВАЛИЕВА.

Снимкыште: Марий тӱмыр, шӱвыр да шиялтыш дене палыме лияш чылалан оҥай лийын.