Каникулышт веселан эрта

Мишкан районысо «Путник» йоча да самырык-влаклан туризм рӱдерын воспитанникше-влак турпоход дене Челябинск областьыш экскурсий дене миеныт. Салават районысо Идрисовский, Насибашевский пещерым, Челябинск кундемысе Тургояк ерым ужын толмаш, «Таганай», «Зюраткуль» национальный паркласе Двуглавая Сопка, Кугу Иремель курыклаш кӱзымаш нунылан кужу жаплан шарнен илаш кодеш.

«Салютыштат» весела!

Калтаса районысо «Салют» тазартыме лагерьыште каныше йоча-влакат йокрокланен огытыл. Кеҥеж каникулышто кок смена жапыште тушто 200 утла йоча тазалыкшым пеҥгыдемден. Нунылан жапым веселан да пайдалын эртараш кугурак йолташ семын вожатый-влак - БГУ-н Бирск филиалжын да Нефтекамск педагогика колледжын студентше-влак - полшеныт. II сменыште «Салютышто» районысо Йоча, самырык-влак да ешлан полышым пуышо социально-психологический служба наркотик, терроризм ваштареш кучедалме шотышто «Лӱдыкшыдымылык школ» проектым ямдылен. Йоча-влак икте-весылан икымше полышым пуаш тунемыныт, тазалык нерген шинчымашым келгемденыт, плакат конкурсышто сӱретленыт.

Лагерьын кудывечыже тиде кечылаштат весела йӱк-йӱан дене темын. Тушто 8-9 августышто районысо турслет эрта. Калтаса район Самырык-влакын пашашт шотышто комитетым вуйлатыше Е. Алексееван мутшо гыч, слетышто 11 ял поселений гыч чумыргышо самырык-влак спорт да туризм шӱлышан квестыште, чаракым сеҥыме таҥасымашыште, уш пӱсы-лыкым тергыме площадкыште, модмо-куштымо батлыште ӱчашат, вий-куатыштым тергат.

Армийыште лийме гаяк

Кеҥеж каникул эркын мучашке лишемеш гынат, йоча-влакым тазартыме йодыш республикыште тугаяк пӱсӧ. 1-7 августышто неле илыш ситуацийыш логалше 100 икшывылан Юматово селаште «Самырык спецназовец-2017» республикысе военно-патриотический лагерь пашам ыштен. Тушто йоча-влак армийысе илыш деке лишемдыме режим дене ик арня илаш тунемыныт. А Татышле районысо Вязовка селаште тиде кечылаште удмурт икшыве-влаклан «Усточикар» тӱнямбал лагерь омсажым почын.

Л. ШАВАЛИЕВА.