Пайдале пашалан кумылаҥда

«Обществылан пайдале пашам шке кумылын, тугок ыштыше айдеме», - тыге умылтара мутер «волонтер» шомакым. «Волонтер» мутым пытартыш ийлаште чӱчкыдын колаш логалеш. Тиде толкыныш ушнышо ӱдыр-рвезе-влак таче тӱрлӧ сомылым шуктат - йырым-йырысе вер-шӧрым эрыктат, олалаште тугок экскурсийым эртарат, спорт таҥасымашлаште, илалше-влаклан полышкалат. Волонтер-влакын календарьыште шке пайрем кечыштат уло. Тудым тӱнямбалне ООН-ын Генеральный Ассамблейжын пунчалже почеш 5 декабрьыште палемдат. Башкортостан Республикыште волонтер-влакын радамышт ий еда ешаралтеш. Поро пашам шуктышо-влак коклаште марий ӱдыр-рвезе-влакат улыт.

Калтаса район У Яш ялын ӱдыржӧ Ирина ШАНГАРИЕВА, Благовещенск педколледжыште тӱҥалтыш класслаште туныктышылан да психологлан тунем лекмеке, йоча-влак дене пашам ышташ шонен. 2010-шо ийыште Бирск кугыжаныш социально-педагогика академийыш заочно тунемаш пурымо деч вара пӱрымаш тудым Калтаса селасе «Центр» вуеш шудымо икшыве-влакын рӱдерышкышт конда. Тусо пашам пырля ыштыме коллективым Ирина кызытат куанен шарналта. Ик жап гыч самырык специалист илаш да пашам ышташ республикын рӱдолашкыже кусна. Тунамак йоча, вуеш шудымо икшыве да самырык-влаклан «Диалог» клуб ушемын «Рекорд» клубыштыжо пашам ышташ тӱҥалеш. Ириналан йоча клубыш яра жапыштым пайдалын эртараш мийыше ӱдыр-рвезе-влак дене пашам ышташ моткоч келшен. Тыге ик жап гыч нине йоча-влак ӱдырын вуйлатымыж почеш изирак волонтер отрядыш чумыргат. Да тӱҥалеш изирак ӱдыр-рвезе-влакын кугу пашашт - тӱрлӧ мероприятий, экскурсий, полыш акций, тулеч моло…

Иринан волонтер отрядше рӱдолаште эртарыме кугурак кӱкшытан мероприятийлашкат ушна. Тыгай паша кокла гыч чолга ӱдыр Уфа олаште эртыше VI Телымсе йоча тӱнямбал модмашым, Олимпийский тулын эстафетыжым, «Диалог женщин. Благотворительность без границ» тӱнямбал форумышто пашам шуктымыжым сайлан шотла. Ирина ик верыште тошкешташ ок йӧрате - шкенжым эре шуара. Мутлан, кодший «Башкортостан наркотик деч посна» республикысе конкурсышто вийжым тергымыже арам лийын огыл - «АнтиСпайс» номинацийыште тудым кумшо вер дене палемденыт. А тений «Волонтер-2016» конкурсыш ушнен да финалыш лектын. «Кугу мероприятийыште волонтер лияш моткоч оҥай. Шкем кугу ешын ужашыже семын шижат. Но эн чотшым мый да отрядысе йочам-влак Кугу Ачамланде сарын, пашан ветеранже-влаклан полыш акций-влакым жаплена. Ме, илалше-влак деке миен, тӱрлӧ сомылым ышташ полшена, пайрем дене саламлена. Нуно мемнам пагалат, эре порын вашлийыт», - каласкала волонтерын илышыже нерген Ирина Александровна.