«Кеҥежын мотор ӱдыржӧ» конкурсышто ойыртемалтше куд ӱдыр илышыште могай улыт? Лудшо-влаклан тидын нерген палаш оҥай, очыни.

Ӱдыр социально-гуманитарный факультетыште тунемеш. Я. Ялкайн лӱмеш Чорай гимназийым шӧртньӧ медаль дене тунем лектын. Лиана школышто куштылго атлетика дене заниматлен, клубысо кружокыш кушташ коштын. Самырык ӱдыр ура чонан - тудо пеленже улшо еҥ-влаклан полшаш йӧрата. Садлан вузышто «Кто, если не мы!» волонтер-влак радамыш ушнен, «Космос» йоча да самырык-влакын рӱдерышт дене кылым куча. Декабрьыште черле йоча-влакым У ий дене саламлаш, нуным модыкташ ямдылалтеш. А эше Лиана фотоаппарат дене пӱртӱсым возгалаш кумылан.

Экономикым шымла, машинам виктарен мошта

Тудо Мишкан селасе «Сбербанкыште» консультант улеш. Студент жапшым моткоч ныжыл кумыл дене шарналта. Людмила «Студент шошо» фестиваль-конкурсышто икана огыл мастарлыкшым ончыктен. Кӱшыл шинчымашым Башкир кугыжаныш университетыште налын, шочмо да руш йылме ден литературым туныктышо лияш ямдылалтын, туштак «бухгалтерский учет да банк паша», а Уфаште «секретарь-референт» ешартыш специальность-влакым налын. Илышыште пеҥгыде койыш-шоктышан, виш кумылан, шке мутшылан шогышо, шонымашыш шуын моштышан улмыж дене кугешна. Жап лийме годым кӱрзе ӱдыр утларакшым научный да сылнымутан книгам лудаш, музыкым колышташ йӧрата.

Ирина ШАЙМАРДАНОВА Калтаса селасе тӱвыра пӧртыштӧ секретарь-делопроизводительлан тырша. Тӱвыра аланыште пашам ыштен, Иринам шкенжымат усталык кумыл авалтен - ик жап «Эрви» калык ансамбльыште куштен. Шкеже Тошто Калтаса ялеш шочын-кушкын. Бирск кугыжаныш социально-педагогический академийыште «Воспитатель, дошкольный образованийын методистше», «логопедия» специальностьым налын. Калтаса тӱвыра пӧртыш куснымеш, ик ий йочасадыште пашам ыштен.

Правоохранительный органыште ыштыше пашаеҥ лияш Настям военный институтышто тунемше, мотор парадный форма дене толшо изаже таратен. «Институтышто йодмаш кугу. Ме лӱйкалаш, тӱрлӧ боевой приемлан тунемына. Чыла тиде мылам келша», - ойла Настя. Тудо Мишкан район Изимар ялеш шочын-кушкын. Сылне марий ӱдыр хоббиланат жапым муаш тырша. «Мураш да кушташ чот йӧратем. Тидлан изинек кызу лийынам. Кевытыште еҥ-влак ончылно шогал муренам», - каласкала шкеж нерген Настя. Мурымо, куштымо дене пырля ӱдыр спорт нергенат монден огыл - утларакшым куржталаш, спорт ориентирований келшеныт. «Илышыште могай пашам ойырен налмым раш умылем. Тудо еҥ-влакым аралаш да кӱлеш годым нунылан полшаш кӱлмӧ дене кылдалтын. «Тыршет гын, чыла лиеш. Куштылго нигуштат уке, коҥгамбалне гына, да туштат кочмо шуэш», - изинек кучем вуйыштем ава-ачамын сугыньыштым.

«Геннадий Александрович Мальгинын эн изирак падырашыже улам», - ойла ӱдыр. Школышто тунеммыж годым Ирина «Шӱшпык» ансамбльыште куштен. Элнет школым тунем лекмеке, Набережные Челны оласе педагогика институтыш тунемаш пурен. Но пашаш финанс сферыш каен. Теве ынде нылымше ий кредит специалистлан ышта, оласе ик офисым вуйлата. Яра жапшым Ирина спортзалыште, пӱртӱсыштӧ эртара - фитнес дене заниматла, велосипед дене кудалышташ йӧрата, йӧн лийме годым ава-ачаж дек унала миен толеш. А эше тудын ачаже, «Элнет» калык ансамбльын художественный вуйлатышыже, Менделеевск районысо марий национально-культурный автономийын председательже Геннадий Александрович дене когыньыштын шӱм-чонлан лишыл пашашт - «фотосомыл» лӱман хоббишт - уло. Ачаже утларакшым фотом ышташ, возгалаш кумылан гын, Ирина изиж годсекак - тудын фотомодельже.

Оласе, республикыласе олимпиадылаште вийым тергыме деч посна, Камилла шкем мер илышыште шуара - олан чапшым вокал, сӱретлыме конкурслаште арала. Ӱдыр спортланат жапым муэш - йолташ ӱдыржӧ-влак дене пырля «Торос» спорт клубыш куштылго атлетика дене заниматлаш коштеш. 2015-ше ийыште оласе краеведений тоштерыште «Мыйын тукымвожем» проектым арален. Камилла шкеж деч изирак йоча-влак пелен лияш йӧрата, садлан шӱм-чоныштыжо школышто але йочасадыште музыкым туныкташ шонымаш шукертак иланен. Кумылжым илышыш шыҥдараш Камилла Уральский кугыжаныш педагогика университетын музыкальный образований кафедрын студентше-влак радамыш логалаш нимынярат тореш огыл. Тачысе кечылан тӱҥалтыш ошкылым тидлан мыняр-гынат ыштыме - олаште шочын-кушшо марий ӱдыр теве ынде индешымше ий музыкальный школышто фортепиано да вокал дене заниматла.

Нине куд ӱдырлан Нефтекамскыште Марий тӱвыра кече-влакым иктешлыме фестивальыште диплом ден медальым кучыкталтеш да профессиональный фотостудийыште лӱмын нунылан эртарыме фотосессийыш ӱжмӧ.