Лудмаш - шӱм-чонлан пайрем

Р. ИЛЬХМАН, Ноябрьск ола, библиотека пашаеҥ:

- Николай Васильевич Гогольын «Вечера на хуторе близ Диканьки» мыскара повестьше-влакым лудам. Ынде иктаж визымше гана лудам дыр, пеш келша. Чыла школ программым уэш лудын лекташ шонем.

Д. ГУБАЕВА, Кӧкыш ял, туныктышо:

- Алексей Александрович Арсакын «Скрипка шортеш», «Шӱм кылдыш», «Кече таҥ» повесть ден ойлымашыже-влакым лудаш тӱҥальым.

М. ВАХИТОВА, Келтей ял, туныктышо:

- Кызыт лудаш жапем уке. Тӱҥ шотышто психологий дене книга-влакым лудам. 

О. КУГУБАЕВА, Кӧкыш ял, тӱвыра пашаеҥ:

- Шукерте огыл М. Шкетанын кум томжымат лудын лектым. Тиддеч посна газет ден журнал-влакымат шергалаш тыршем. «ВКонтакте» соцкылыште тӱрлӧ оҥай историй-влакым лудаш йӧратем. 

Г. ИШТЫБАЕВА, Екатеринбург ола, унагудо пашаеҥ:

- Кызыт Айн Рэндын «Атлант расправил плечи» произведенийжым лудам. Кумшо книгашкыже шуым. Тыгак Николай Рубцовын почеламутшо-влакым, тидыжым, конешне, шӱм-чон йодмо почеш, лудам. Тыгак Борис Рыжийын почеламутшо-влак келшат. 

А. ИЛЬТИМИРОВА, Калтаса села, кадр шотышто специалист:

- Пытартыш жапыште поснак йот элысе литературым йӧратен шынденам - Джоди Пиклотын «Искра надежды» романже пеш келшыш. Кызыт Блейк Краучын «Западня. Занесённые снегом» произведенийжым лудам. 

В. БАЙДУГАНОВА, Нефтекамск ола, туныктышо:

- Кызыт индешымше классыште тунемше-влак дене пырля М.Ю. Лермонтовын «Герой нашего времени» романжым лудына. 

Кузе коеш, тӱҥ шотышто кугурак ийготан еҥ-влак книгам лудыт. Тыгаяк йодышым школышто тунемше икшыве-шамычланат пуышым. Иктыштат нимогай книгамат огыт луд, да шукышт «Лудаш ынде модно огыл» манын каласышт.