Пӧлеклаш лиеш… книгам

Сылнымутан произведенийым кызытсе жапыште электрон книгаштат муаш лиеш, конешне. Но тиде, книгам кидыш налын, лаштыклен, келшыше ужашыш пӧртылын, тудым уэш-пачаш шер теммеш лудмо дене икте огыл. Ончыч яллаште, мутлан, кажне гаяк ешыште тӱрлӧ газетлан сералтыныт, самырыкше-илалшыже библиотекыш книгалан миеныт. Саман вашталтме дене тыгай сӱрет утыр шуэнрак вашлиялтеш. Книгам лудшыжо - кеч олаште, кеч ялыште - адакат тӱҥ шотышто кугурак тукым. Йоча-влак лудмо сомыл деч йӱкшеныт. Литератур уроклан южыжо произведенийын кӱчык содержанийжым интернетыште пел шинча дене ончалме денат серлага. Изи ньога але йолымат налын шуктен огыл - ава-ача кидышкыже телефоным тушкалта. Теве тыге кушкын толшо тукымым лудмашлан «шӱмаҥдена». 

Книгам лудмаш тӱняужмашым кумдаҥда, шӱм-чоным пойдара, койыш-шоктышым шуара, илыш нерген шонкалаш тарата - икманаш, сай туныктышо, ӱшанле йолташ улеш. Неле годым тудо айдемым лыпландарен, йокрокланыме жапыште  кумылым нӧлтен, яра жапым пайдалын эртараш полшышо арвер лийын кертеш. Кызыт книгам лудаш чыла йӧн уло: библиотека, тыгак оласе кевытлаште классик-влакын произведенийыштым, кызытсе автор-влакын возымыштым муаш лиеш, интернет-кевыт-влакат книга сатуштым темлат. Тыге ок келше гын, кеч интернет вапшыште электрон книгам ончал да луд. 

А эше лудаш йӧратыше еҥлан сай книга эн кумылло пӧлек лийын кертеш! Пӧлеклыза книгам - йолташдалан, шочшыдалан, палымыдалан. Тидлан шочмо кечым вучымо але вес амалым кычалме ок кӱл, вет вашке 14 февраль шуэш. Тудым кечышот календарьыште Книгам пӧлеклыме кече семын палемдыме...