Кевытыште налаш? Шке ончен кушташ?

Кечын кевытыш коштшо оласе калыклан пакчасаскажымат оксала налаш логалеш вет. Южыжо ял озанлык ярмиҥга годым теле гочлан мешак дене налын шапашла. Тыгеже кешырым, пареҥгым кевыт гыч кече коден килограмм дене наледаш гын, пакчасаска тылзылан, векат, «шӧртньӧ» акыш погына. Теве супермаркетыште таче ик килограммжым могай ак дене налаш лиеш: пареҥге - 36-40 теҥге (мушкын ужалымыже - 70 теҥге, фасоватлен оптымыжо - 36-70 теҥге), кешыр - 27 теҥге (мушмыжо - 60 теҥге), кавун - 70-99 теҥге, ош вуян ковышта - 30 теҥге, йошкар вуян ковышта - 80 теҥге, йошкарушмен - 40 теҥге, шоган - 37-44 теҥге, ош, йошкар шоган - 90-100 теҥге, ужар, йошкар пурыс - 109, 350 теҥге. 100 грамм чеснок 40 теҥге наре шога. Киярым 80-109 теҥгелан, помидорым 150-170 теҥгелан налаш лиеш. Акышт теле вашеш эшеат «кушкеш».

Кажныже ола тӱрыштӧ пакчам ок кучо. Южыжын уло гынат, кошташ мӱндыр, налаш шулдырак, маныт. Южо еҥ шошо, кеҥеж гоч ноен-ярнен пакчасаскам куштымеш, налын кочкаш куштылгыраклан шотла. Кӧн ялыште родо-шочшыжо уло, пакча поянлыкым, конешне, тушеч шупшыкта. А эше вашлиялтеш тугай сӱрет, кунам ялысе-влак шкештат кызытсе илышыште пакчасаскам, уке-уке да, кевыт гыч наледат. Илалшыракшым але, иктажын емыж начарынрак шочын гын, умылаш лиеш. Но мо оҥайже, южо мӧҥгыштӧ шинчыше самырык-влакат тачысе кечын пакчасаскам кевытыш миен налын веле толыт. Туштат оласе койыш шыҥаш тӱҥалын гын веле? Тугодымак пашам ыштен тунемше кугурак-влак, «кевытыште пешат шергыс» манын, тидыжымат-тудыжымат шындаш да ончен кушташак тыршат…