Пайремын вес могыржо

Школ линейкыш ӱдыр-влак ончычсо школ формым чиеныт толыныт, нунын воктен шем костюмым чийыше рвезе-влак кугу еҥла койын шогат. Таче нунылан туныктышо да ава-ача-влак сугынь мут ден саламлымашым ойлат. А нунышт вашеш тауштен ойлат,  пеледышым да мурым пӧлеклат, чылам сымыстарен, пытартыш школ вальсым куштат. Тыге мотор чиен школ дене чеверласаш ямдылалте деч ончыч мыняр тургыжланымаш лийын да шийвундо каен - тидым ава-ача веле пала. 

Кызыт тыгай «модо» пурен: йочасадым пытарат - кугу пайремым ыштат. Тӱҥалтыш школым тунем лекме деч вара адак пайрем, индеш але латик классым тунем пытарыше-влакым ойлыманат огыл. 

Мыйын икшывем тыглай классым пытарыш гынат, можо мыняре пытыш але кучылталте… шот гычат лектым. Эн ондак фотокарточкылан оксам погышт. Вара тунем лекмым пайремлаш шонен пыштышт. Йӧра илыме олаште гына пайремлат ыле гын, уке, нунылан олалашке - Уфаш, Ижевскыш але Нижнекамскыш каяш кӱлеш, а тушко кудалаш автобуслан гына иктаж кумло тӱжем наре тӱлыман. Эше билетлан посна погат да икшывын кӱсенышкат иктаж-мыняр гынат оксам «шуралтыман». Чыла тидым шотлен лукмек, ик йочалан гына вич тӱжем теҥге утла окса кӱлеш. Кӧн ава-ачаже поян, нунылан нимогаят ок чуч. Шуко чеҥгесымек, олаштак пайремлан кӧнышт. Тыште роскот изирак лиеш манын шонышым, но куанем кужун ыш шуйно. Шотлен лукмек, пале лие: тынар оксалан вес олашке еш дене миен, канен толаш лиеш ыле. Но икшывет кайынеже гын, нигуш от пуро - тӱлет. Кастене, малаш вочмо деч ончыч, телефонысо школ чатыш смс-влак толаш тӱҥальыч. «Ынде мо лийын гын?» - шонем семынем. Тефонышкем ончальым гын, чылан туныктышылан пӧлекым налаш каҥашат, ала-кудыжо тортым, эше ала-мом заказатлен,  адакат оксам погат. Вот тыге. Кеч-могай йодышым тарватат гынат, ондак окса нерген мут лектеш, Школышто гына огыл, моло вереат тыге дыр, шонем.

Ну, илыш кайыш! Тыглай классым тунем лекташланат кӱсеныштет лу тӱжем деч шагал огыл окса лийшаш. Кунам тыгайыш куснен шуктышна, ала?