Каласышаш шомакем уло. Жапым ойырен от шоч

Вара школ капитальный ремонтлан петыралте, ик тунемме идалык наре йоча-влак вес школышто тунемыч, тунемше-влак кастене пеш йӱдеш ынышт код манын, урокым кумло минут марте кӱчыкемдышт. Эше тиде тукым дене идалыклан кум-ныл гана, пожар але вооруженный нападений годым шкем кузе кучаш туныктен, тренировкым да эвакуацийым эртарат. Школышто шокшо кочкышым тугок кочкыт, кажне тунемме арня тӱҥалтыште нуно школыш лу минутлан ончычрак мият: Российын да республикын флагыштым нӧлталыт, элын да Башкортостанын гимныштым мурат.  Жапым ойырен от шоч да йочам чаманаш огыл, туныкташ кӱлеш, маныт. Тыгай вашталтыш-влаклан тиде тукым ӱдыр-рвезе-влак дене пырля икымше туныктышышт-влакланат тунемаш да жап дене тӧр ошкылаш тыршаш логале.  Самоизоляций годым куд-шым ияш улшо ӱдыр-рвезе-влак тений тӱҥалтыш школым тунем пытарышт. 

Индеш ий ончыч Нефтекамск оласе шымше ден кандашымше школым иктыш ушышт. Кандашымше школын зданийжым тӱҥалтыш класс-влаклан, шымшыным кугурак класс-влаклан ыштышт. Тений тыште нылымше классым, «А» гыч тӱҥалын «Ж» марте, шым параллельный класс, кажныштыже 25 деч шагал огыл ӱдыр-рвезе тунем пытарыш. Тӱҥалтыш школ дене чеверласыме пайремыш выпускник-влак ава-ачаштымат ӱжыныт ыле. Сандене тушто лияш мыламат пиал шыргыжале. Моктаныде, кугешнен каласем - пеш келшыш! «Я карантин, я ремонт - тиде тукым могай лиеш гын?» манын, ик гана гына огыл шоналтенам. Дисциплинылан тунемше чапле тукым кушкеш улмаш! Пайрем шагат наре шуйныш гынат, тӱҥалтыш гыч мучаш марте сай дисциплина озаланыш, ӱдыр-рвезе-влакын пеҥгыде койыш-шоктышан улмышт палдырныш. Школ илыш гыч мыскара, чеверласыме вальс, йоча-влакын тӱжвал тӱсышт да вургемышт - чылажат шинчам куандарен, кумылым савырен. Выпускник-влак хор дене кум мурым мурышт. Кок шӱдӧ наре йочалан ик йӱк дене мурым мурыкташ «дирижёр-влаклан» шагал огыл пӱжвӱдым йоктараш да жапым ойыраш кӱлын дыр?! Тыгай мотор пайремым эртарымышталан икымше туныктышына Г.Г. Гильфановалан да тӱҥалтыш школын коллектившылан шӱм гыч лекше таум каласыме шуэш. Выпускник-влаклан кеҥежым сайын каналташ да визымше классыште у вий дене, пеҥгыде негыз дене шинчымашым пойдараш тыланем. Эн тӱҥжӧ - тек тӱнямбалне тыныс лиеш.