Витле ныл теҥгелан поянрак

У ийыш тошкалмеке, шуко тӱрлӧ окса полышым пуаш тӱҥалме нерген кутырат. Ик кечын «Госуслуги» порталышке пурышым. Ончем, лаштыкышкем серыш толын: «Тендан ӱдырда кандаш ийым темен, могай окса полышым налын кертыда, ончалза». Чынак, ӱдыремын шочмо кечыже икмыняр кече ончыч гына эртыш. Ну, шонем, иктаж пособийым налаш тӱҥалам гын, кеч изиш шӱкалтыш лиеш. Яра жапым муын, йодмашым возен колтышым.

Икмыняр кече эртымек, адак «Госуслуги» порталышке пурышым. Ончем, эше серыш толын. Ну, шонем, вес тылзын оксам вучыман. Серышым почын лудаш тӱҥальым гын, «Отказ» манын возымо. Чын, малоимущий еш деч витле ныл теҥгелан поянрак улам улмаш.

Теве тыге. Кӧлан, нигӧ деч полышым вучыде, шке вий дене гына ыштен, икшывым йол ӱмбак шогалтыман, йочасадыш, школыш, тӱрлӧ кружокыш (тудыжат оксала) кондыштарыман, а кӧ пособийлан кӧра пашамат ыштыде илен кертеш, кленчашкат «ончалаш» жапым муыт да мемнан деч сайын илат.