Тул толеш гын, чыла наҥгая

Кодшо арнян Краснокам район Коян села воктене чодырам «йошкар агытан» авалтен ыле. Тиде пожар 76 гектар кумдыкыш шарлен. Тудын ден вич кече кучедалыныт. Калык чот полшен, кажне кечын йыр ялла гыч еҥ-влак погыненыт, Нефтекамск ден Дӧртыльӧ олала гычат лийыныт. Тиде кечылаштак Амзя чодыра комбинатыштат пожар лийын, тидлан кӧра 9 гектар кумдыкышто шудо йӱлен. Тудо жапыштак тиде селаште пӧрт, гараж да монча йӱлаш тӱҥалыныт. Пожарым йӧрташ кугу мардеж нелылыкым ыштен, туге гынат моло пӧртым тул деч арален коден кертыныт. 

Белорецк да Гафури районлаштат 15 гектар кумдыкышто чодыра йӱла. Кок чодыра пожарым Белорецк ден Баймак районлаште, а Учале, Дӧртыльӧ районлаште полигонышто йӱлышӧ шӱкшакым йӧртеныт.

Пожар шкеак толын огеш пиж, айдемын титакше пеш кугу. Шарныза! Пӧртыштӧ электроприборым, электровоштырым эскерен шогыза, пӱртӱсыштӧ тул дене ида мод, тамак сескем гычак кугу пожар лектын кертеш.