У окса

- Ӱдырем, - малдале, - пенсий шалатыше мотор ӱдыр ала-могай вес тӱрлӧ оксам пуэн кодыш. Ончал-ян, чын окса але уке?

- Ониса ковай, тиде 200 да 2000 теҥгеаш у окса-влак, - лыпландарышым.

А тудо вашеш кугунрак шӱлалтышат, илышыштыже лийше томашам каласкалаш тӱҥале:

- Ик-кок ий ончыч мый денем тугай паша лийын кайыш. Тӱлышашем шуко погынен ылят, райрӱдыш каен колтышым. Банкыш пурышым. Самырык кассир ӱдырлан тӱлышаш кагазем-влакым шуялтышым. Тудет 5100 теҥгем шотлен лукто. Мыйжат, шоҥго карта, мӧҥгыштем тыгыдыракым огыл, кугурак оксам налынам. Тӱлашлан оксам ситымылан куанен, ӱдырлан шуялтышым. Кассир мыйым ӧрын ончале, оксамым кӱш нӧлталын, шымлен нале. «Ковай, тиде оксам кушеч нальыч?» - йодо вара. «Шондык гыч луктым», - манам. «Кызыт тыгай окса уке вет». «Кузе уке?» манынат шым шукто, воктекем кок чулым рвезе толын шогале. Мый лӱдмем дене чуч тушанак йолем шуялтем. Кугурак капанже «Ковай, почешем ошкыл» малдале.

Мыйын йылмем тӱҥӧ, нимом пелештыде, почешышт соптыртатышым. Банк гыч лекнат, автомашинашкышт шинчаш полшышт. Участок манмашкышт налын кайышт. Ала-мом пеш возкалышт. Вара кидым пышташ йодыч. «Ик пагытлан мӧҥгет колтена», - маньыч.

Кужу жапат ыш эрте, нунын дек эше мияш вереште. Тумарте йылмем лывыргыш, мо-кузежым паленак налаш тыршышым. Саде кагазше 50 тӱжемаш ожсо окса лийын, тудым кызыт огыт кучылт улмаш. Садлан, ӱдырем, тулеч вара палыдыме сӱретан оксам ужамат, лӱдам веле. Оксажат вет вашталт шога, умыло теве - кудыжо у, кудыжо шоя.