Икымше икшывылан тӱлымӧ окса пособий нерген

2018 ий 1 январь гыч «О ежемесячных выплатах семьям, имеющим детей» федерал закон вийым налын. Тудын дене келшышын, икымше икшыве шочмылан але тудым ончаш налмылан (усыновлений) тылзе еда оксам тӱлышаш улыт.

Тений тыгай выплатым ава-ачалан икшыве 2018 ий 1 январь деч вара шочын, Россий Федерацийын гражданинже улеш да ешын кокла парышыже 14247 теҥге деч шуко огыл гын, тӱлат.

Окса пособийым налаш ешын праваже уло але укем палашлан ешысе кажне еҥын (ава, ача да икшыве але шкет ава да икшыве) пытартыш 12 тылзаш парышыжым иктыш ушен, ондак 12-лан, вара ешыште улшо еҥ (тышке шочшо икымше икшывымат пуртыман) чотлан пайлыман. Шотлен лукмо оксан кугытшо 14247 теҥгем ок эрте гын, ежемесячный выплатым налашлан «Калыклан социальный полышым пуышо республикысе рӱдер» ГКУ-н филиалышкыже (филиал-влакын адресыштым Еш, паша да калыкым социально аралыше министерствын mintrudrb.ru сайтыштыже) але Многофункциональый рӱдерыш (www.mfcrb.ru) йодмашым пуыман.

Палемдаш кӱлеш, тыгай оксам икшыве шочмылан куд тылзе эртымешке, кӱшнӧ палемдыме учрежденийлаш йодмашым возымо годым тӱрыснек тӱлат. Моло годым оксам тӱлымӧ радам йодмашым пуымо жап деч шотлалтеш.

2018 ийыште икымше икшыве шочмылан тӱлымӧ оксан кугытшо 8892 теҥгеш шуэш. Тидлан йодмашым икшыве шочмо деч вара куд тылзе эртымеке веле пуымо годым заявитель 53,3 тӱжем теҥге наре оксажым «йомдара».

Л. ГРИГОРЬЕВА.