«Стартап автобус» бизнеслан полша

Предпринимательство да туризм пашам виктарыше госкомитет Изи предпринимательствым вияҥдаш полшышо фонд дене пырля 2014 ийыште «Стартап автобус» проектым республикыште тарватеныт. Тиде программа дене келшышын бизнесым шукерте огыл почшо предприниматель-влак шке пашаштым шуяш йӧнан корным муын кертыт.

Мом тиде ончыкта? Эксперт, бизнес-тренер-влак БР-ысе Предпринимательство да туризм шотышто госкомитетын, Изи предпринимательствым вияҥдаш полшышо фондын, банкын, верысе администрацийын еҥышт дене пырля, ик автобусеш погынен, тӱрлӧ районла ден олалаш мастер-класс ден семинар-влакым эртараш лектын коштыт. Икманаш, тӱҥалше але ушнаш шонышо предприниматель-влаклан полышым пуат. Поснак сайын тыршыше предприятий-влакын опытыштым шымлат, муниципалитетыште йӧсылык улмым, яра мланде але пуста зданий-влакым шотыш налын, бизнес-проектым чоҥат.

«Стартап автобусыш» кӧ ушнен кертеш? Бизнесым почшо еҥын регистрироватлалтмыжлан 3 ий эртен огыл гын, лач тыгай-влаклан тиде проект. Кумылышт гына лийже. Кӱкшӧ экперт оценкым налше проект-влаклан верысе кучем полышым пуэн шогышаш.

Пытартыш кок ий жапыште «Стартап автобус» Кугарче, Зианчура, Зилаир, Баймак, Хайбулла, Абзелил, Учале районлаште лийын. Тӱҥалше бизесмен-влак шкеныштын районыштышт проблеме-влакым шымленыт, илышыштышт изи бизнес вержым акленыт, предпринимательын пашаштыже йӧсылык нерген каласкаленыт. Проектын лектышыже семын Кугарче районышто лазер оборудований дене сувенир-влакым лукташ тӱҥалаш палемдыме, бизнес-планыш тыгак турбазым почаш да портышкемым ышташ пуртымо.

Абзелил районысо Магнитогорск-Яктыкуль кугорнышто кафе-унагудым чоҥат, тидлан 500 тӱжем теҥге финанс полышым кугыжаныш ойырен. Альшей районышто, 300 тӱжем теҥге полышым кучылтын, арендоватлыме зданий негызеш изинек вияҥ кушкаш полшышо йоча рӱдерым почыныт. Дуван район гыч предпринимательлан тӱкан шолдыра вольыкым ашнаш 289 тӱжем теҥгем пуэныт, Караидель районышто турбазым почыныт, тушко кугыжаныш 300 тӱжем теҥгем пуэн. Нуриман районышто 298 тӱжем теҥгелан «Красный ключ» унагудым чоҥеныт.

«Башкортостан Республика» Издательский пӧрт редакцийын колтымо материалже негызеш ямдылыме.