Изи икшывым Интернет тӱняш пуртен ида колто

Мыйын ӱдырем-влак изишт годым мален колтымышт деч ончыч йомакым колышташ йӧратат ыле. Шкеат ойленам, книгамат лудынам. Ынде шкештат ава улытат, «Авай, мыланна тӱрлӧ йомакым ойлет, колышташ пеш оҥай ыле вет» малдат. Ӱдыр уныкам-влакат (кызыт 15 да 21 ияш улыт) йомакым колышташ йӧратат ыле. Кызыт 3 ийым эрталтыше эрге уныкам уло. Икана нунын дек унала мийымем годым малаш кодымат, кастене аваж ден ачаже прогулкыш кайышт, а ме тӱрлӧ модыш дене модна.

- Айда, Сашок, тылат йомакым ойлем, - маньым. Тунам уныкам кок ият пелаш веле ыле. «Реве» йомакым ойлышым, пеш колышто.

- Келшыш? - йодым.

- Ага, - пелештыш ньога. - Коча, кова, уныка, пий, пырыс, коля ревым пырля шупшын толашеныт, а мый, тушто лиям гын, подъемный краным намием да шупшын луктам ыле, - ешарыш.

«Эше могай йомакым ойлышаш гын?» - шоналтышым. Агытан нерген йомакым шке семынем «савыральым»: кузе мут колыштдымо агытан пакчаш лектынат, кӱын шудымо ужар виноградым кочкын да черланен.

- Ковай, ужар виноград пеш пайдале, кузе агытан черланен кертеш? - йодо уныкам.

Теве тыге эртыш мемнан йомак касна. Но кызытсе йоча-влак, поснак оласе-влак, йӧршын вес тӱрлӧ улыт - Интернет, мобильный телефон, планшет дене «кылдалтынытак» мо? Шукынжо ожсо руш калык йомакым, мультфильмым огыт ончо. Тугай мультфильмым ончат, кузе тудым умылат, шонен ӧрам. Мыйын уныкам гына огыл, чыла йоча тыгай.

Эше ик случайым шарналтышым. Декабрьыште медосмотрым эртыме годым регистратурыш черетым вучаш вереште. Ончылнем самырык ача да кок ияш ӱдыржӧ шогат ыле, икшывын аваже кабинетлаш черетым налаш кайыш. Ӱдыр почешыже «Авай, авай» манын шортын кодо. Ачаже олмам шуялтыш, ӱдыр ыш нал, бананат ыш йӧрӧ. Йоча тугак шортеш. Ача кӱсенже гыч мобильный телефоным луктын пуыш. Икшыве шортмыжым чарныш, воштыл-воштыл колта, шке семынже ала-мом чокиен, аважымат мондыш. Мобильный телефон тудлан адреналин гай лие.

Самырык ача-ава-влаклан изирак каҥашым пуынем: йочадам, йодеш манын, изинек Интернет тӱняш пуртен ида колто, вес ганарак кораҥден огыда керт. Шкаландат йӧсӧ лиеш, йочат орлана. Лучо кузат книгалан шӱмаҥдаш тыршыза.

А. АРТАМОНОВА.