Все новости
Саманын тӱсшӧ
8 Ага 2018, 16:33

Пырысиге

Шыже эр. Юалге. Калык автобус остановкыш вашка. Еҥ аман чумырген, икшыван ава-влакат улыт.

Кенета йол йымалне изи чумырка койылалтыш. Йоча-влак тудым эн ончыч шекланен шуктышт да шымлаш тӱҥальыч. Изи гына ошалге-нарынче пырысиге кылмен, шужен, чонеш логалшын кычкыра. «Тӱвӧ, пырысиге-влакым конден шоленыт. Кокытшо колен, тидыжат вашке чыпча дыр», - пелештыш ик ӱдырамаш. А пырысиге аман йол коклаште коштеш, кем ӱмбакат шинчын тӧча, шалаварешат пижын кӱзынеже. Чапаже кылмен аман.

Шуко еҥже кораҥ шогале. Пырысиге, аптыранен, колышо пырысиге-влак ӱмбак миен шинчеш. Пунешышт йолжо ыра дыр, адак еҥ-влак дек каен колта. Теве ик эрге воктен чарналтыш. Тудыжо кораҥат, эргын аваж велыш тарваныш. Ӱдырамаш пырысигым чумал кораҥдыш, «Казыр вуетым тошкалам» мане. Эргат, меат, воктенже улшо-влак, колышт шогена. Чонемлан пеш йӧсӧ лийын кайыш. Молан вара ала-могай торжа айдеме пырысиге-влакым пӧртыштыжӧ кугемденат, автобус остановкыш конден кудалтен? А тиде ава шке икшывыжлан могай торжа койышым ончыктыш? Эн лишыл еҥын примерже йочан шӱмыш пеш вашке шыҥа.

Автобус тольо. Калык вашке гына шокшо автобус кӧргыш пурен шинче. А пырысиге остановкеш шкетынак магырен кодо…

Райрӱдыштӧ сомылемым пытарен, мӧҥгӧ пӧртыльым. Автобус гыч нылытын: кок шоҥгырак ӱдырамаш да эше аваж ден ӱдыржӧ - волышна. Ӱдыр иктаж коло ийым эрталтыше улеш. «Шкет гына кает, мыят мием?» - йодо ава ӱдыржӧ деч. «Айда вара тыят», - мане ӱдыр. «Кушко тыге кайынеда?» - йодна ме. «Ала-кӧ остановкыш пырысиге-влакым конден шолен. Иктыже кодын, молыжо шужен-кылмен коленыт. Кочкашыже пыштынена, «Китикетым» нална», - умыландарыш ава. «Вара молан налын гына огыда кай?» «Пӧртыштӧ мемнан тыглаят икмыняр пырысна уло, кузе чыла поген ашнет?» - мане аваже.

Мый адак шонаш кодым. Изи пырысигым иктышт торжан шӱкалыт, весышт чаманат. Ик гана «Китикетым» пукшен гына, илышыжым арален кодаш ок лий. Но айдемын чаманен моштымыжо тыште пеш сайын коеш. Воспитаний еш гыч тӱҥалеш. Тиде гана ава, кувава шке примерже дене торжа койышлан туныктыш. Тек таче пырысигым обижатлыш, а вет эрла йоча шке торжалыкшым аваже але моло еҥ ваштареш савырал кертеш. А иктаж гана, можыч, ава шкежат аптырана: молан икшывем мылам тыге осалын пелешта, кушечын тудын тыгай койыш-шоктыш? А вет вара, кӱлеш гын, кид денат шуэш… Арамлан мо «Мом ӱдет - тудо шочеш» маныт.

Л. ЮСАЕВА.

Маядык ял, Дӧртыльӧ район.
Читайте нас: