Кевытыш йӱшывуя керылт пурен

Нефтекамск олан прокуратурыжо тиде олаштак илыше 39 ияш гражданин лӱмеш тарватыме уголовный паша почеш титаклыме заключенийым пеҥгыдемден. Ик пӧръеҥ март тылзыште, кочкыш-йӱыш сатум ужалыме кевытыш йӱшывуя пурен, ужалышым пневматический пистолет дене лӱдыктен, ик кленча кочывӱдым пуаш шӱден. Кӧ улмыжым ынышт пале манын, пӧръеҥ чурийжым маске дене авырен. Осал пашажым мучашке шукташ тудлан сатум налше машаен. Жапыштыже толын шушо полиций пашаеҥ-влак пӧръеҥым кученыт. Следствий кайыме жаплан тудым эрык деч посна коденыт. Олан прокуратурыжо уголовный пашам судыш колтен.

А. НАДЕЖКИН, Нефтекамск олан прокуроржо.