Все новости
Саманын тӱсшӧ
13 Пургыж 2018, 16:26

Прокуратура увертара

Тулык икшыве-влаклан илыме верым ойыреныт


Верысе гражданинын илыме вер шотышто правам шыгыремдымылан вуйшиймашыже почеш олан прокуратурыжо тергымашым эртарен. Ава-ача деч посна кодшо гражданиным ола администрацийыште 2007-ше ийыште илыме верым пуашлан учетыш шогалтеныт улмаш. Туге гынат ола администраций вуеш шушо тулык икшывылан илыме верым черет деч посна ойырен огыл. Тыгаяк ситуацийыш олаште эше 13 тулык ӱдыр-рвезе логалын. Нуно оласе прокуратурыш шке праваштым аралаш йодын миеныт. Прокуратура ола администраций ваштареш судыш искым пуэн. Тачысе кечылан нине тулык икшыве-влаклан чылаштлан илыме верым пуэныт.


Контрафакт сатум ужалаш шонен


Нефтекамск олан прокуратурыжо 50 ияш гражданин лӱмеш тарватыме уголовный паша почеш титаклыме иктешлымашым луктын. Тудым РФ УК-н 171.1 статьян 5-ше ужашыж почеш преступленийым ыштымыжлан (маркироватлыдыме кочывӱд продукцийым аралымаш, шупшыктымаш да ужалымаш) титаклат. Тудо эртыше ий сентябрьыште Казахстаныште 100 утла коробко маркироватлыдыме кочывӱдым налын да олаште, тыгак республикын воктенысе районлаштыже ужалынеже улмаш. Тыгай шонымаш дене контрафакт сатум автомашинаж дене россий чек гоч луктын кертын. «Тергыме закупкым» эртарыме годым тудым полиций сотрудник-влак кученыт. Обыск годым правоохранительный орган пашаеҥ-влак 238330 теҥгелан кочывӱдым темыман 1 тӱжем утла кленчам верештыныт. Гражданин титаклыме дене тӱрыснек келшен. Уголовный пашам судыш колтымо.


Суртыш пурен, погым толеныт


Олан прокуратурыжо Бирск олаште илыше кок гражданиным арестоватлыме нерген пунчалым луктын. Нуно Нефтекамск олаште илыше гражданинын суртышкыжо йӱшывуя пуреныт да, кӱзӧ дене лӱдыктен, оксам йодаш тӱҥалыныт. Тореш лиймыжлан озам кыреныт, сото телефонжым налыныт да шылыныт. Ик жап гыч пӱсӧ ӱзгарыштлан пӧртылмышт годым полиций пашаеҥ-влак кидыш логалыныт. Суд законым пудыртышо-влакым эрык деч посна кодаш пунчалым луктын. Шкешт титакыштым ӱмбакышт налын огытыл. Прокуратура расследованийым кузе намийымым тӱткын эскера.


«Полшынеже» улмаш, но... оптышеш пижын


Олан прокуратурыжо полиций пашаеҥ шотышто тарватыме пашам шымла. Следствийын увертарымыж почеш, кодший декабрь тылзыште полицийын пӧлкаже тиде олаштак илыше ик ӱдырамашын преступлений дене кылдалтме пашаже шотышто доследственный тергымашым эртарен. Полиций пашаеҥ мутым кучаш шогалтыме деч кораҥашлан ӱдырамашлан полышым темлен. Тидлан 30 тӱжем теҥгем йодын. Ӱдырамаш тидын нерген правам аралыше органлаш увертарен. Окса миен шумеке, нунышт полиций пашаеҥын уда койышыжым тӱжвак луктыныт. Полицейский титаклыме дене келшен огыл. Суд полиций пашаеҥым кок тылзылан эрык деч посна кодаш пунчалым луктын.

А. НАДЕЖКИН, олан прокуроржо.

Нефтекамск ола.
Читайте нас: