Весела илыш

Ялысе илышлан куанаш веле кодеш. Яндар юж, пӱртӱс, йырым-йыр тыныс, пошкудо дене миен-толын, икте-весылан полшен илена.

Теве пошкудо Олина кокам кужаш пурен огылат, йомдарышым, шке миен толаш шонен пыштышым. Мийышым гын, ончем, Олина кокам, ӧрдыжлужым кучен, пыкше шинчылтеш. «Шуҥгалтынат, ӧрдыжлужым эмгатен дыр», - шоналтен колтышым. «Корно пеш иян вет, эплынрак кошташ кӱлеш», - эркын, ойгатарыде гына пелештышым. 71 ияш кокам, илышыже пеш йӧсӧ лийын гынат, пеш поро да весела улеш. Воштыл колтен, шке ойгыжым ойлаш тӱҥале.

«Самырык годым кредал коштын омыл гынат, шоҥгемме велеш Брюс Ли гаяк лияш логале, - манеш. - Пошкудо ялыште 95 ияш ачам ила, районлан сар корным эртыше ик ветеран веле кодын докан. Тиде арнян унала миен тольым. Йокмам погышым, кастене, сомылым пытарымек, изиш кутыралтен шинчена, могырым луштарена манын, кочывӱдымат пыштышым. Туддеч посна кызыт нералташат ок лий - могыр коршта, омо кошка.

Ачам дек ӱдырем намиен кодыш. Тыге кастене ӱстел йыр чумыргышна. Вот томаша, ялыште илена вет, нигунам капкам тӱкылымаш уке, пошкудо-влак эреак пурен коштыт.

Тудо кастенат омса почылто - ныл рвезе пурен шогале, чурийыштым чулка дене петыреныт. Ме нуным ӱстел тӧрыш эрташ ӱжна, йоча-влак модын коштыт, шонена. Ик рвезыже, мыйым ужын, лектын куржо. Иктаж палымем лийын докан. А кумытшо ялтак саде герой шпион гай чучыч. Иктыже кочам сургыкташ, оксам ячаш тӱҥале, молышт пӧрт кӧргыштӧ кычалтылыт. Кочат кӱсен гыч иктаж 200 теҥге наре луктын пыштыш. Рвезе оксам кӱварыш пурактарыш, «Мылам тыгай ок кӱл, шуко кӱлеш» ыштале. Мый, шуко шоныде, ӱстелысе яра кленча дене рвезын вуйжым рашкалтышым, саде ыҥгай мыламат логале. Мыйым вес пӧлемыш шӱкен луктыч. Телефон дене пешыже пайдаланен ом мошто да адакшым нимогай номерым ом шарне гынат, «Алло, алло, тыште мемнам толат, пуштнешт!» манын кычкыраш тӱҥальым.

Тидым колын, рвезе-влак лектын куржыч. Изиш шӱлалтен, сурт кӧргӧ арверым погышна. Эрлашыжым, каныш кечылан, шольым тольо. Чыла радамлен ойлышна. Тудо милицийым (Ала кызыт «полиций» маныт, ом пале.) ӱжыктыш. Нуно каслан толын шуыч, кугу пий-влак дене чыла ончышт, шеҥыч. «Ондален ӱжыктенат» манын, шольымым шынден наҥгайышт. Шольым эрлажлан веле тольо: полиций пашаеҥ-влак «шӧртньӧ» четлыкыштышт малтен луктыныт улмаш. Ынде шонаш кодым, кызытсе илышыште кӧлан ӱшанаш лиеш - ял калыклан, пошкудылан? А полицийлан ӱшанаш лиеш мо?»

А. НИКОЛАЕВА.