+12 °С
Ясно
Россий калыкын Тӱвыра поянлык идалыкше
28 Января 2022, 10:35
Кужнур ялын «пеледышыже-влак»
Оҥай еҥ да коллектив-влак нерген Россий калыкын Тӱвыра поянлык идалыкше дене кылдалтше материал-влакым савыкташ тений кок рубрикым почына: «Мастар-влак» да «Пошкырт кундемысе марий ансамбль-влак». Шкендан нерген (кидмастар-влакымат ушнаш ӱжына) почто гоч, редакцийын электрон адресышкыже cholman@mail.ru але газетын vk.com/cholman лаштыкышкыже возен колтымыдам вучен кодына.
«Нур пеледыш» фольклор калык ансамбль.
Кажне калыкын шке йӱлаже, шке койыш-шоктышыжо уло. Марий-влакынат мурымаш-куштымашышт моло калыкын деч ойыртемалтеш. Мемнан Кужнур ялысе «Нур пеледыш» фольклор ансамбльлан 2000-ше ийыште «калык» лӱмым пуэныт.
Коллективын мастарлыкшым ужшо-влак тудым нигӧ дене огыт пулаштаре. Ансамбльын репертуарышкыже шагал огыл ожсо, тыгак Шочмо элым, пӱртӱсым моктымо, йӧратымаш нерген марий муро-влакым пуртымо. Коллективын рӱдыжым 1986 ийыште чумырымо. Кажныжын ешыже, шукыштын уныкаштат уло гынат, мураш-кушташ йӧратыше-влак чонышт дене эре самырык кодыт. Шке усталыкыштым эре шуарен, вияҥден шогат.
«Нур пеледыш» калык фольклор коллективым Уфаште, Йошкар-Олаште, Мишканыште, Калтасаште, моло вереат палат, а Бирск олан уремлаж дене ошкылмо годым еҥ-влак саламлалт эртат.
Коллективна тӱрлӧ конкурсышто да фестивальыште усталыкшым ончыкта, тудым ятыр диплом да Чап грамот дене палемденыт. Икымше февральыште «Нур пеледыш» фольклор ансамбль «калык» лӱмжым пеҥгыдемда.
Новости партнеров
