Паспортым жапыштыже вашталтыза

Россий Федерацийын кажне гражданинже, 20 да 45 ияш лиймеке, шке паспортшым алмашташ кӱлмӧ нерген шарнышаш. Тидым, палемдыме ийготым темымеке, 30 кече деч вараш огыл ыштен шуктыман. Паспортым тиде жапыште алмаштен шуктыдымо годым, Административный правонарушений нерген кодекс дене келшышын, 2 гыч 3 тӱжем теҥге марте штрафым тӱлыктен кертыт. Тений, мутлан, миграций пӧлкан пашаеҥже-влак тиде законым пудыртымылан 10 тылзе жапыште 188 еҥым мут кучаш шогалтеныт.

Тачысе кечын паспортым, Госуслугын единый порталыштыже регистрацийым эртен (www.gosuslugi.ru сайтыште регистрацийым 20 да 45 ийым темыме годым огыл, ончылгочрак эртыман), электрон йӧн денат налаш але алмашташ лиеш. Мо сайже, йодмашым «Госуслуги» портал гоч электрон йӧн дене пуымо годым кугыжаныш пошлинылан скидка семын шийвундым 30 процентлан шагалрак тӱлыман.

Паспортым Многофункциональный рӱдерыштат алмаштен кертыт (Нефтекамск олаште тыгай учреждений Строитель-влак уремын 59-ше пӧртыштыжӧ верланен.).