Пашадарым тӱлаш «монденыт»

Нефтекамск олан мировой судьяже чоҥымо фирме вуйлатышылан РФ УК-н 145.1 статьяж почеш титаклыме приговорым луктын. Следствий палемден: фирме вуйлатыше 2016-шо ий февраль гыч 2017-ше ий апрель марте предприятийын 292 пашаеҥжылан пашадарым йӧршын тӱлен огыл. Парымже чумыржо 25 миллион теҥгеш шуын. Титаклыме вуйлатыше оксам ий мучко поставщик-влак дене расчетым ышташ кучылтын.

Фирме вуйлатыше титакшым тӱрыснек ӱмбакыже налын. Кодший май тылзыште должностьшым коден. Прокуратурын тергымыж деч вара пашаеҥ-влаклан пашадарым тичмашнек тӱлымӧ. Суд фирма вуйлатышылан 150 тӱжем теҥге штрафым тӱлаш пунчалым луктын.

А. НАДЕЖКИН, Нефтекамск олан прокуроржо, юстиций советник.