Чиян карандаш

Изи ӱдыр пычкемыш пӧртыш лӱдынрак пурыш. Настян электротулым чӱктымекше гына чонжылан ласканрак чучын колтыш. Йырваш ончале, пӧлемыштым шкенжын пӧртшӧ дене таҥастарыш. А Настя гын пӧлем мучко лыве гай «чоҥештылеш», чайым йӱаш пога. Кас кочкышым ыштымек, Настя пырдыжысе омсам почат, Маринам вес пӧлемыш наҥгайыш. 

Ӱдыр чылт ӧрӧ. Йырым-йыр ончалмек гына кушто улмыжым умылыш - нуно туныктышо-влакын пӧлемыштышт улыт улмаш. Ӱстелыште журнал-влак, йоча-влак деч погымо тетрадь-влак койыт. Тудым чиян карандашан изи коробка ӧрыктарыш. Тыгай коло ныл тӱсан чиян карандаш-влакым тудо нигунамат ужын огыл. Ялысе кевытыштат огыт ужале. Ӱдыр коробка ӱмбалне сӱретлыме карандаш-влакым кужу жап ончен шогыш, но кидше дене ыш тӱкӧ. Настя пӧлем мучко кошто, ала-мом ойлыш, вара Маринам мӧҥгӧ шӱдырале. Чиян карандашан коробка ӱстелешак кодо. 

Эрдене Марина, мӧҥгыжӧ каен, вашке гына вургемжым вашталтен тольо. Кугу перемен годым ӱдырым учительскийыш ӱжын пуртышт. Марина деч чиян карандаш нерген йодышташ тӱҥальыч. Карандашыже аважын биологийым туныктышо шольыжын лийын. Вара йочам шылталаш тӱҥальыч. Изи ӱдыр нимомат пелештен ыш керт, чӱчӱжлан ӧпкелен, лӱдын, йӱкын шортын колтыш.

Урок деч вара туныктышо мӧҥгышкышт мийыш. Ӱдырын аваж дене пӧртыштӧ чиян карандашым кычальыч, но ышт му, вет Марина тудым кидше денат тӱкен огыл. Аважланат тидымак ойлен. Тунам Настя нерген шоналтенат, тудын нерген каласенат огыл. Лач шке семынже гына ятыр жап ӧрын шонкален коштын: «Кушко карандаш йомын? Кушеч Марина нерген пален налыныт? Ала тиде Настян пашаже лийын? Чиян карандаш тудлан келшен гын, тудым лӱмын унала ӱжын кертын». Тидлан шуко жап эртен гынат, ӧпкеже алят мондалтын огыл.