Муно вор

Теве пошкудо Галят, шкенжын вийжым, тазалыкшым терген, телылан лу чывым, ик казам ончаш кода. Шкет илыше ватылан ситен пытен. Ӱстел ӱмбалне шӧр, муно лиеш. Кевыт гыч налме гай огыл, чыла шкендын. Адакшым икшыве-влакланат йокма олмеш олаш пуэн колтет. Лиймыже лийже, верже муылтеш.

Илыш тугай вет, чылажат шонымо семын ок лий. Икмыняр рвезе чыве муным мунчаш тӱҥалеш. Галя, куанен, муным налын пура. Ик-кок арня налмек, пыжашыште муно йомеш. Чыве кечын кыдекла, но муно уке. Вуйыш тӱрлӧ ой толын пура, мом манашат ок пале. 

Оралтыште Жулик пийже опталта. «Ала чыве муным чынак тый кочкат, лӱметат «Жулик» вет?» - манын, пийжым йолыштен шогалта. Ик кече эрта, весе, а пыжашыште муно садак уке. Мом ышташ? Олагоракат, пырысат огыт кой, но муно йомеш. Кузе муно ворым кучаш?

Икана чыве кыдеклен лекме деч вара Галя вӱташ пурен кая. Онча, каза, йолжо дене муным пудыртен, шӱмжыге кочкын, пыжашым нулен шында. Ӱдырамаш ялт ӧреш. «Теве каза мом ышта! Каза казалыкшым ышта». Тыге озавате муно шолыштшым куча. Но вет палаш кӱлеш, тыге лийын кертеш мо?

Эрдене пийым чылвыр гыч мучыштара, а казам олмешыже йолышта. Пиет почшым рӱзалтен кудалеш. Каза кас марте йолыштымаште шога. Озавате вӱташ пурен ончалеш - муно-влак пыжашыштак кият.

Кузе лияш, мом ышташ? Мом манашат от пале. Казан муно кочмыжым чараш ок лий. Казам ужалаш але шыллан колташ? Коктеланен шонен коштмыж годым уремыште вольыкым налаш толшо кечывалвел еҥ-влакым ужеш. Шуко шоныде, казажым ужален колта, оксаж дене пошкудо ял гыч Зааненский урлык ош казам налын конда. Тыге Галян ӱстелыштыже эре шӧр да муно лиеш.